ამერიკის შეერთებული შტატების პრეზიდენტი ჯო ბაიდენი და ვიცე-პრეზიდენტი კამალა ჰარისი ახლო აღმოსავლეთში არსებული დაძაბულობის ფონზე ეროვნული უსაფრთხოების გუნდს შეხვდნენ.
როგორც მედია წერს, ამერიკელი ოფიციალური პირების თქმით, ეროვნულმა უსაფრთხოების გუნდმა ბაიდენსა და ჰარისს განუცხადა, რომ ჯერ კიდევ უცნობია, როდის განახორციელებენ ისრაელის წინააღმდეგ თავდასხმას ირანი და „ჰეზბოლა“. ბაიდენსა და ჰარისს ასევე უთხრეს ისიც, რომ თავდასხმის სპეციფიკის შესახებ მცირე ინფორმაციაა ხელმისაწვდომი.
ამასთან, შეხვედრაზე განხილული იყო ახლო აღმოსავლეთში არსებული დაძაბულობის დეესკალაციის შესაძლებლობები, მათ შორის, ცეცხლის შეწყვეტისა და მძევლების გათავისუფლების შეთანხმების მეშვეობით.
შეხვედრის დასრულების შემდეგ თეთრმა სახლმა გაავრცელა ინფორმაცია, რომ შეერთებული შტატები უპასუხებს ერაყის ბაზაზე განხორციელებულ სარაკეტო თავდასხმას, რომლის დროსაც რამდენიმე ამერიკელი სამხედრო დაშავდა.
ცნობისთვის, ერაყში სამხედრო ბაზაზე თავდასხმის შედეგად, სულ მცირე, ხუთი ამერიკელი სამხედრო დაშავდა. ამის შესახებ ინფორმაციას სააგენტო „როიტერი“ ამერიკელ ოფიციალურ პირებზე დაყრდნობით ავრცელებს.
ოფიციალური პირების განცხადებით, სავარაუდო სარაკეტო თავდასხმა ერაყში, ალ-ასადის საჰაერო ბაზაზე განხორციელდა. წყარომ უსაფრთხოების სამსახურიდან აღნიშნა, რომ ერაყის დასავლეთით მდებარე ბაზისკენ ორი რაკეტა „კატიუშა“ გაუშვეს, რომლებიც ბაზაზე ჩამოვარდა.
