გორში პაპუნა ლოცულაშვილის საქმეზე დაკავებული პატრულ-ინსპექტორი ალექსი ბადალოვი წარდგენილ ბრალდებას არ ეთანხმება. ამის შესახებ მისმა ადვოკატმა, ნოდარ ცინცაძემ, სასამართლო პროცესის დაწყებამდე განაცხადა.
ადვოკატის თქმით, საქმის მასალებში არსებული მტკიცებულებები მისი დაცვის ქვეშ მყოფის ბრალეულობას არ ადასტურებს. მისივე განმარტებით, მხოლოდ ვიდეოკადრებში ფიგურირება არ ნიშნავს, რომ პირი დანაშაულებრივ ქმედებაში მონაწილეობდა.
გორის რაიონულ სასამართლოში სხდომა რამდენიმე წუთის წინ უნდა დაწყებულიყო, თუმცა პროცესი გადაიდო მას შემდეგ, რაც მოსამართლე ლევან დარბაიძემ საქმეზე თვითაცილება აიღო. არსებული ინფორმაციით, იგი ერთ-ერთ ბრალდებულთან ნათესაურ კავშირშია. ამჟამად საქმე სხვა მოსამართლეს გადაეცემა.
ნოდარ ცინცაძის განცხადებით, ალექსი ბადალოვი შემთხვევის ადგილზე ოფიციალური გამოძახების საფუძველზე მივიდა და ამ ეტაპზე მის მიმართ წარდგენილი ბრალდება სათანადო მტკიცებულებებით გამყარებული არ არის.
„საქმის მასალების გაცნობის შემდეგ დადგინდა, რომ ჩემი დაცვის ქვეშ მყოფი თავს დამნაშავედ არ ცნობს. მას ბრალად ედება სამსახურებრივი უფლებამოსილების ძალადობით გადამეტება, თუმცა ამ დროისთვის არსებული მასალებით მისი მხრიდან უკანონო ან ძალადობრივი ქმედების ჩადენა არ იკვეთება,“ – განაცხადა ადვოკატმა.
რაც შეეხება კითხვას, დაინტერესდა თუ არა პოლიციელი დაზარალებულის ჯანმრთელობის მდგომარეობით, ცინცაძის თქმით, მას ჯერ ბრალდებულთან დეტალური კომუნიკაცია არ ჰქონია და აღნიშნულ საკითხზე ინფორმაცია არ გააჩნია.
საქმე გორში, ე.წ. კომბინატის დასახლებაში მომხდარ ინციდენტს უკავშირდება, რომლის დროსაც, გამოძიების ინფორმაციით, სამართალდამცველებმა პაპუნა ლოცულაშვილსა და მის მეგობარზე ფიზიკურად იძალადეს.
მომხდართან დაკავშირებით დაკავებულია ექვსი სამართალდამცველი. მათ ბრალი სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით წარედგინათ, რაც ძალადობით ჩადენილ სამსახურებრივი უფლებამოსილების გადამეტებას გულისხმობს. აღნიშნული დანაშაული 5-დან 8 წლამდე თავისუფლების აღკვეთას ითვალისწინებს.
ამასთან, გამოძიება მიმდინარეობს თავად პაპუნა ლოცულაშვილის მიმართაც სისხლის სამართლის კოდექსის 353-ე მუხლით, რომელიც პოლიციელის მიმართ ძალადობას ეხება.
