პოლიცისტური საკვერცხის სინდრომი
პოლიცისტური საკვერცხის სინდრომი – რატომ არის დროული დიაგნოსტიკა მნიშვნელოვანი? – გვესაუბრება პინეოს მეან-გინეკოლოგი, რეპროდუქტოლოგი – სოფო კვალიაშვილი
–ქალბატონო სოფო, რა არის პოლიცისტური საკვერცხის სინდრომი და რატომ საუბრობენ მასზე დღეს ასე ხშირად?
პოლიცისტური საკვერცხის სინდრომი, რომელსაც დღეს უფრო ხშირად პოლიენდოკრინულ-მეტაბოლურ საკვერცხის სინდრომსაც უწოდებენ, ერთ-ერთი ყველაზე გავრცელებული ენდოკრინული და მეტაბოლური დარღვევაა. მსოფლიოში ის 10 მილიონზე მეტ ქალს აღენიშნება და მნიშვნელოვნად მოქმედებს როგორც რეპროდუქციულ, ისე ზოგად ჯანმრთელობაზე.
– რა სიმპტომები შეიძლება მიანიშნებდეს ამ სინდრომზე?
ყველაზე ხშირი ნიშნებია არარეგულარული მენსტრუაცია, ოვულაციის არარსებობა, უნაყოფობა, სხეულზე ჭარბი თმიანობა (ჰირსუტიზმი), აკნე, თმის ცვენა, ასევე ჭარბი წონა და მეტაბოლური დარღვევები. თუმცა, ყველა ქალს ეს სიმპტომები შესაძლოა ერთდროულად არ აღენიშნებოდეს, რის გამოც დიაგნოსტიკა ხშირად რთულდება და შემთხვევების დიდი ნაწილი დაუდგენელი რჩება.
– როგორ უკავშირდება პოლიცისტური საკვერცხის სინდრომი უნაყოფობას?
ეს სინდრომი ქალის უნაყოფობის ერთ-ერთი ყველაზე მნიშვნელოვანი მიზეზია. ანოვულაციით გამოწვეული უნაყოფობის შემთხვევების დაახლოებით 70–85% სწორედ პოლიცისტური საკვერცხის სინდრომთან არის დაკავშირებული. დროული დიაგნოსტიკა და სწორი მკურნალობა ბევრ ქალს ორსულობის მიღწევის შესაძლებლობას აძლევს.
– რა არის მკურნალობის მთავარი მიზანი?
მკურნალობა ინდივიდუალურად იგეგმება და მისი ძირითადი მიზნებია ჰიპერანდროგენიისა და მისი გამოვლინებების (ჰირსუტიზმი, აკნე, ალოპეცია) შემცირება, მეტაბოლური დარღვევების კორექცია და გულ-სისხლძარღვთა გართულებების რისკის შემცირება, ენდომეტრიუმის ჰიპერპლაზიისა და კიბოს განვითარების რისკის პრევენცია, საჭიროების შემთხვევაში ეფექტური კონტრაცეფციის შერჩევა, ხოლო ორსულობის დაგეგმვისას – ოვულაციის სტიმულაცია და რეპროდუქციული ფუნქციის აღდგენა.
– რას ურჩევდით ქალებს?
თუ გაწუხებთ არარეგულარული მენსტრუაცია, აკნე, ჭარბი თმიანობა, თმის ცვენა ან ორსულობა ერთი წლის განმავლობაში არ დგება, მნიშვნელოვანია დროულად მიმართოთ გინეკოლოგ-რეპროდუქტოლოგს. ადრეული დიაგნოსტიკა და სწორად შერჩეული მკურნალობა მნიშვნელოვნად აუმჯობესებს როგორც ცხოვრების ხარისხს, ისე რეპროდუქციულ ჯანმრთელობას.
