ბატონი სილვიუ დომენტე, ჯანმრთელობის მსოფლო ორგანიზაციის (WHO) წარმომადგენელი საქართველოში, ასრულებს თავის მისიას შვიდწლიანი მოღვაწეობის შემდეგ.
ბ-ნი სილვიუ WHO საქართველოს წარმომადგენლობას სათავეში 2019 წელს ჩაუდგა. მისი მონდომებით, WHO კიდევ უფრო საიმედო პარტნიორი გახდა, რომელიც საქართველოს ჯანდაცვის სექტორში არსებული პრიორიტეტების გატარებასა და რეფორმების განხორციელებაში უჭერს მხარს.
ბატონი სილვიუს ხელმძღვანელობის პერიოდში საქართველომ საზოგადოებრივი ჯანდაცვის მიმართულებით მნიშვნელოვან წარმატებებს მიაღწია. მისი მხარდაჭერით:
– ქვეყანაში დაარსდა WHO კოლაბორაციული ცენტრი ვირუსული ჰეპატიტების ელიმინაციის დარგში;
– გადაიდგა ისტორიული ნაბიჯი, როცა WHO-მ საქართველო მალარიისგან თავისუფალ ქვეყანად გამოაცხადა;
– წარმატებით დაინერგა თამბაქოს კონტროლის კანონმდებლობა;
– განხორციელდა ჯანდაცვის სისტემის უმნიშვნელოვანესი რეფორმები, მათ შორის, დიაგნოზთან შეჭიდული ჯგუფების (DRG) მიხედვით ჰოსპიტალური გადახდის სისტემისა და ესენციურ მედიკამენტებზე რეფერენტული ფასების შემოღება.
2025 წელს, ბატონი სილვიუს ხელშეწყობით, ქვეყანაში პირველადი ჯანდაცვის ყოვლისმომცველი რეფორმა დაიწყო, რაც მნიშვნელოვანი ნაბიჯია უფრო ხელმისაწვდომი, მაღალი ხარისხისა და პაციენტზე ორიენტირებული სამედიცინო მომსახურების უზრუნველსაყოფად. მან მნიშვნელოვანი წვლილი შეიტანა არაგადამდებ დაავადებებთან ბრძოლაში, ციფრული ჯანდაცვისა და ჯანმრთელობის საინფორმაციო სისტემების გაძლიერებაში, ტელემედიცინის გაფართოებასა და საზოგადოებრივი ჯანდაცვის სერვისების გაუმჯობესებაში.
რაც მთავარია, ბატონი სილვიუ გამორჩეული ადამიანია, კეთილგანწყობილი და კოლეგებისა თუ პარტნიორებისადმი მუდამ პატივისცემით განმსჭვალული. იგი მუდმივად ხელს უწყობს ინოვაციებს და ყოველთვის გვახსენებს რომ თითოეული რეფორმისა თუ პროგრამის მიღმა დგანან ადამიანები, რომელთა ცხოვრების გაუმჯობესებაც ჩვენი საქმიანობის მთავარი მიზანია.
WHO საქართველოს გუნდის სახელით გვსურს გულწრფელი მადლიერება გამოვხატოთ ბატონი სილვიუ დომენტეს მიმართ, გამორჩეული ლიდერობის, დაუღალავი შრომის, ჩვენი გუნდისადმი გამოცხადებული ნდობისა და იმ ფასდაუდებელი წვლილისთვის, რაც მან საქართველოს მოქალაქეთა ჯანმრთელობისა და კეთილდღეობის საქმეში შეიტანა.
* * *
ბატონ სილვიუსთან გამოსამშვიდობებელი საღამო ქართული მედიცინის ისტორიის მუზეუმში გაიმართა. მადლობას ვუხდით მასპინძლებს და ყველა სტუმარს, ვინც დაგვეხმარა ეს საღამო კიდევ ერთ დაუვიწყარ მოგონებად გვექცია.
