იშვიათი დაავადებების სამკურნალო ახალი პრეპარატები და სხვადასხვა ქვეყნის გამოცდილება იყო ერთ-ერთი მთავარი თემა შეხვედრებზე, რომლებიც მიხეილ სარჯველაძემ ბელგიელ და პოლონელ კოლეგებთან, ასევე საერთაშორისო პარტნიორი ორგანიზაციების წარმომადგენლებთან გამართა.
“აუცილებელი და უმნიშვნელოვანესია მეცნიერული მტკიცებულებები“, – აცხადებს საქართველოს ჯანდაცვის მინისტრი.
მინისტრის თქმით, საკითხთან დაკავშირებით არაერთი კითხვა არსებობს ევროპულ ქვეყნებშიც.
“ეს არ არის ის სფერო, სადაც მხოლოდ ემოციებზე დაყრდნობით უნდა მიიღებოდეს გადაწყვეტილება. რასაკვირველია, აუცილებლობაა, რომ პასუხისმგებლობით იყოს განმსჭვალული ნებისმიერი გადაწყვეტილება. აუცილებელია, სამედიცინო პროცესებზე, მეცნიერული მტკიცებულებების შეკრება და მხოლოდ ამის საფუძველზე გადაწყვეტილების მიღება. იმ მეცნიერული მტკიცებულებებისა, რომელზე დაყრდნობითაც ჩვენ შეგვეძლება საუბარი იმაზე, თუ რამდენად უსაფრთხოა რომელიმე კონკრეტული მედიკამენტი. ვის? როგორ? რა წესით უნდა ჩაუტარდეს კონკრეტული თერაპია და ა.შ. ყველა ეს საკითხი, არამცთუ საქართველოსთვის, არამედ პრაქტიკულად მთელი მსოფლიოსთვის არის შესწავლის და დაკვირვების საგანი. არავის არ აქვს დღეს შესაძლებლობა, რომ რაიმე სწრაფი, ნაჩქარევი გადაწყვეტილებები იქნეს მიღებული, ვინაიდან, კიდევ ერთხელ, ხაზგასმით უნდა აღინიშნოს, რომ ეს დაკავშირებულია პაციენტების უსაფრთხოებასთან და ეს დაკავშირებულია ამ კონკრეტული მედიკამენტების სარგებელთან – რა სარგებლის მოტანა შეუძლია რეალურად? სხვაგვარად, ძალიან მაღალია, ძალიან დიდია შეცდომის, გარდაუვალი შეცდომის დაშვების რისკი”, – განაცხადა მიხეილ სარჯველაძემ.
