“ელიზაბეტ არდენის” საცხი ჯანმრთელობისათვის მავნე აღმოჩნდა
რუმინეთის სახელმწიფო მაკონტროლებელმა ორგანომ გამოავლინა, რომ “ელიზაბეტ არდენის” ბრენდის სახის საცხი ჯანმრთელობისათვის მავნე ნივთიერებას butylphenyl methylpropional (BMHCA)-ს შეიცავს. ნივთიერება მითითებულია პროდუქტის შემადგენლობის ჩამონათვალში. ევროკავშირის ქვეყნებში აღნიშნული ნივთიერების გამოყენება კოსმეტიკურ პროდუქციაში აკრძალულია. მან შეიძლება დააზიანოს ადამიანის რეპროდუქციული სისტემა და, ორსულობის შემთხვევაში, ნაყოფი.
პროდუქტის სახელწოდება ეტიკეტის მიხედვით: Ceramide Premiere – Intense Moisture and Renewal Overnight Regeneration Cream
საფრთხის შემცველი პარტიის ნომერი: E5NC
მოდელის ტიპი/ნომერი: CERN 40092
შტრიხკოდი: 085805127107
გავრცელებული ინფორმაციიდან უცნობია ზემოაღნიშნული პარტია საქართველოშიც თუა შემოსული. თუმცა, თუკი ეს პროდუქტი შეძენილი გაქვთ, ან აპირებთ მის შეძენას, ყურადღება მიაქციეთ მისი პარტიის ნომერს, რომელიც ეტიკეტზე უნდა იყოს დატანილი.
იმედი გვაქვს, რომ საქართველოში “ელიზაბეტ არდენის” პროდუქციის შემომტანები და გამყიდველები არ დაუშვებენ საფრთხის შემცველი ნიმუშების გავრცელებას, ხოლო უკვე გაყიდულ პროდუქციას დაიბრუნებენ.
ეს ფაქტი კიდევ ერთი დადასტურებაა იმისა, რომ
- ყველა, მათ შორის, მსოფლიოში სახელგანთქმული კომპანიების პროდუქციაც კი შეიძლება საფრთხის შემცველი აღმოჩნდეს.
- აუცილებელია, რომ საქართველოშიც დაწესდეს ყველა სამომხმარებლო პროდუქციის უსაფრთხოების სახელმწიფო კონტროლი, როგორც ეს ევროკავშირსა და მსოფლიოს ბევრ სხვა ქვეყანაშია. ამის გარეშე, საქართველოს მოქალაქეების ჯანმრთელობის დაცვა შეუძლებელია.
ევროკავშირის სახელმწიფო მაკონტროლებელი უწყებების მიერ გამოვლენილი საფრთხის შემცველი არასასურსათო პროდუქციის შესახებ სიახლეებს შეგიძლიათ თვალი ადევნოთ საიტზე https://ec.europa.eu/safety-gate-alerts/screen/webReport#weeklyReports
