რა სიმპტომები ახლავს თან ანევრიზმას და როგორია მისი მკურნალობის მეთოდები.
უსიმპტომო თავის ტვინის ანევრიზმა – რა უნდა ვიცოდეთ ფარული საფრთხის შესახებ
უმეტეს შემთხვევაში, თუ ანევრიზმა მცირე ზომისაა, ის შეუმჩნევლად და უჩვეულო ნიშნების გარეშე მიმდინარეობს. პაციენტებს ხშირად არც კი აქვთ წარმოდგენა, რომ ამ ტიპის ცვლილება მათ სისხლძარღვებში არსებობს. მხოლოდ განსაკუთრებულ სიტუაციებში – მაგალითად, როცა ანევრიზმა კონკრეტულ ადგილას მდებარეობს – შესაძლოა შეიმჩნეოდეს მსუბუქი ხმაური ყურში ან სხვა უცნაური შეგრძნება. თუმცა, ამ შემთხვევაშიც კი, ზუსტი დიაგნოზის დასმა მხოლოდ სიმპტომებზე დაყრდნობით შეუძლებელია.
განსხვავებული სურათი გვაქვს მაშინ, როცა საქმე გიგანტურ ანევრიზმასთან გვაქვს. ასეთ შემთხვევაში, ის უკვე მასის ეფექტს ქმნის – მსგავსი ფორმირება შესაძლოა თავის ტვინზე ზეწოლით სიმსივნის არსებობას მივიჩნიოთ. სწორედ ამიტომ, დიაგნოსტიკა და ტვინის სიღრმისეული გამოკვლევა გადამწყვეტ როლს ასრულებს.
გადაცემაში “იმუნიტეტი” “ამერიკული ჰოსპიტალი თბილისის” წამყვანი ნეიროქირურგი ცოტნე ჩხიკვიშვილი საუბრობს:
„თუ ანევრიზმა დიდი ზომის არ არის, ასეთ შემთხვევაში, ძირითადად, უსიმპტომოდ მიმდინარეობს. ძალიან იშვიათად, როცა კონკრეტულ ლოკაციაზეა, შუილის ან მსგავსი სიმპტომი იყოს, მაგრამ ასეთ დროსაც პირდაპირ ვერ ვიტყვით. გიგანტური ანევრიზმა კი სიმსივნის იმიტაციას აკეთებს, რადგან, როგორც მასა, ისე აწვება თავის ტვინს.
ძირითადად, პაციენტებთან, რომლებმაც ანევრიზმა შემთხვევით აღმოაჩინეს, მაგნიტურ-რეზონანსული ტომოგრაფია გადაღეს, ის სიმპტომები, რის გამოც კვლევა დაიწყეს, ანევრიზმასთან არაფერ შუაში არ არის ხოლმე. არც თავბრუსხვევა, არც თავის ტკივილი, არც გულისრევა და არც სხვა რაიმე მსგავსი ნიშანი… ანევრიზმას თუ აღმოვაჩენთ, მისი კონტროლი და მონიტორინგი განსაკუთრებით მნიშვნელოვანია, რომ გადავწყვიტოთ, პაციენტს ოპერაცია სჭირდება თუ არა.
თავის ტვინის ანევრიზმა ხშირად უხმაუროდ ვითარდება და მისი აღმოჩენა ორ გზას უკავშირდება: ან შემთხვევით ხდება დიაგნოსტიკური კვლევისას, ან სერიოზული სიმპტომების გამოჩენის შემდეგ.
ყველაზე საშიში და გადამწყვეტი მომენტი არის ის, როცა ანევრიზმა სკდება – ამ დროს ერთ-ერთი უმთავრესი და დამახასიათებელი სიმპტომია უეცარი და წარმოუდგენლად ძლიერი თავის ტკივილი. პაციენტები მას ხშირად ახასიათებენ როგორც “ყველაზე მტკივნეული თავის ტკივილი ცხოვრებაში”.
თუ მსგავსი სიმპტომი გაწუხებთ, განსაკუთრებით თუ ტკივილი უეცრად გაჩნდა და არ გავს ჩვეულებრივ მიგრენას ან წნევისგან გამოწვეულ ტკივილს – დაუყოვნებლივ უნდა მიმართოთ ექიმს ან სასწრაფო დახმარებას. ანევრიზმის გაწყვეტა საჭიროებს სწრაფ დიაგნოსტიკასა და მკურნალობას, რათა თავიდან ავიცილოთ სერიოზული გართულებები.
ანევრიზმის აღმოჩენის ორი გზა არსებობს – ის ან შემთხვევით შეიძლება აღმოვაჩინოთ ან მისი გასკდომის შემთხვევაში გავიგოთ. გასკდომის შემთხვევაში, ძალიან მნიშვნელოვანი სიმპტომი არის ის, რომ პაციენტს უეცარი, თავის ისეთი ძლიერი ტკივილი ეწყება, როგორიც ცხოვრებაში არასდროს ჰქონია. ასეთ დროს არ უნდა დაელოდოთ და არ უნდა იფიქროთ, რომ წნევა გაქვთ, ან სხვა რამ. უეცარი, გაუსაძლისი თავის ტკივილის დროს აუცილებლად უნდა მიმართოთ საავადმყოფოს.
ანევრიზმის გამოვლენის შემდგომ მოქმედების 3 ვარიანტი გვაქვს. დავაკვირდეთ, ხომ არ იზრდება ზომაში, ხომ არ იცვლება და პაციენტი წელიწადში ერთხელ, 6 თვეში ერთხელ ან ინდივიდუალური გრაფიკით გამოვიკვლიოთ.
გვაქვს ოპერაციული მკურნალობა, რომელიც ორ ნაწილად იყოფა – ერთი ღია ქირურგიული ჩარევაა, მეორე დახურული, მინი-ინვაზიური მეთოდი, რომელიც კორონაროგრაფიის მსგავსი პროცედურაა, თუმცა თავის ტვინში ტარდება.
