საერთაშორისო გამომცემლობა Sage-ს ჟურნალში: “Breast Cancer: Basic and Clinical Research” გამოქვეყნდა კლინიკა “კონსილიუმ მედულას” ონკოფსიქოლოგის და ფსიქიატრის, თამარ კახნიაშვილის სტატია “კორელაცია სოციო-დემოგრაფიულ მახასიათებლებსა და დეპრესიას შორის ძუძუს კიბოს მქონე პაციენტებში: მულტიცენტრული, ჯვარედინ-სექციური კვლევა“.
სტატიაში გაანალიზებულია სამეცნიერო კვლევის შედეგები, რომელიც თბილისის ონკოლოგიური პროფილის კლინიკებში ჩატარდა: კლინიკა “კონსილიუმ მედულა”, კავკასიის მედიცინის ცენტრი, მარდალეიშვილის სამედიცინო ცენტრი, ხეჩინაშვილის საუნივერსიტეტო კლინიკა.
კვლევის ფარგლებში გამოიკითხა 207 პაციენტი ქალი, რომლებიც ონკოლოგის მეთვალყურეობით აქტიურად მკურნალობდნენ. პაციენტების საშუალო ასაკი 53 წელია, ქორწინებაში იმყოფებოდა 131 ქალი (63,2%), 207 პაციენტიდან დასაქმებული იყო 92 (44.5%), მათგან მხოლოდ 14.5%-ს ჰქონდა ადეკვატური ფინანსური სტატუსი.
კვლევამ გამოავლინა, რომ ძუძუს კიბოთი დაავადებული პაციენტების თითქმის ნახევარს (42%) აქვს სხვადასხვა სიმძიმის დეპრესიული სიმპტომები, მათგან 15%-ს აღენიშნება საშუალო/ მძიმე დეპრესიული სიმპტომატიკა და საჭიროებს პროფესიულ დახმარებას. სტატისტიკურად მნიშვნელოვანი კორელაცია გამოვლინდა დეპრესიას და ფინანსურ სტატუსს, უმუშევრობას, განათლების დონეს შორის.
კვლევის მიგნებები კიდევ ერთხელ ადასტურებს ონკოლოგიური პაციენტების მკურნალობის პროცესში ფსიქო-სოციალური ფაქტორების მნიშვნელობას.
კვლევა ღირებულია, როგორც სამეცნიერო, ისე პრაქტიკული თვალსაზრისით. ის მნიშვნელოვან ინფორმაციას გვაწვდის ონკოპაციენტების მკურნალობის ეფექტიანობის გასაზრდელად.
კვლევაში მნიშვნელოვანი წვლილი შეიტანა, კავკასიის მედიცინის ცენტრის ონკოლოგიური განყოფილების ხელმძღვანელმა, პროფესორმა ივანე კილაძემ. კვლევაში მონაწილეობდა, ასევე, თსუ-ს მედიცინის ფაკულტეტის პროფესორი, ფსიქიატრი ნინო ოკრიბელაშვილი.
„კონსილიუმ მედულა“
