2024 წლის 15 ივნისს გაიმართა საქართველოს პერსონალურ მონაცემთა დაცვის ოფიცერთა ასოციაციის მე-4 საერთო კრება.
,,პერსონალურ მონაცემთა დაცვის შესახებ’’ საქართველოს კანონის თანახმად, რომელიც ძალაშია 2024 წლის 1 მარტიდან, დღის წესრიგში დადგა პერსონალურ მონაცემთა დაცვის ოფიცრის ინსტიტუტის ჩამოყალიბება, რამაც მთელი რიგი საკითხების შემუშავება, სისტემატიზაცია მოითხოვა. ამასთან აუცილებელი გახდა საზოგადოებრივი ცნობიერების ამაღლება, კერძო და საჯარო სექტორისათვის სწორი ინფორმაციის მიწოდება.
კრებაზე წარდგენილი იქნა ასოციაციის მიზნები, საქმიანობა და ასოციაციის ვებგვერდი. აგრეთვე ეთიკის კომისიის თავმჯდომარემ ნინო ენდელაძემ წარადგინა ეთიკის კოდექსის პროექტი.
შეხვედრაზე ასოციაციის კომისიებმა განიხილეს დებულებები. ასოციაცია შედგება შემდეგი კომისიებისგან:
• ეთიკის კომისია;
• ოფიცერთა უფლებების დაცვის კომისია;
• იურიდიულ საკითხთა კომისია;
• საერთაშორისო და რეგიონალური ურთიერთობების კომისია;
• პროფესიული განვითარების კომისია;
• საორგანიზაციო კომისია.
პერსონალურ მონაცემთა დაცვის ოფიცერთა ასოციაცია წარმოადგენს ორგანიზაციას სადაც გაწევრიანებულია 100-მდე (ასი) ოფიცერი, როგორც სხვადასხვა სექტორიდან ისე საჯარო თუ კერძო ორგანიზაციიდან. ჩვენი ასოციაცია აქტიურად ახორციელებს კანონმდებლობის დამუშავებას და ხელს უწყობს მის ინტეგრაციას როგორც ცენტრალიზებულ ისე რეგიონალურ დონეზე.
ასოციაცია ახორციელებს საკანონმდებლო თუ კანონქვემდებარე აქტების სათანადოდ დამუშავებას და აქტიურადაა ჩართული ამ მიმართულებით ევროკავშირის წევრი სახელმწიფოების გამოცდილების შესწავლაში. ამასთან ასოციაცია თანამშრომლობს რამოდენიმე საერთაშორისო ორგანიზაციასთან, რომელთაც მრავალწლიანი პრაქტიკა აქვთ პერსონალური მონაცემების დაცვის მიმართულებით.
