როგორ ვისწავლოთ ჩვენი თავისადმი სიყვარულით მოპყრობა და რა მნიშვნელობა აქვს ამას?
საუბრობს ფსიქოლოგი თამარ თანდაშვილი გადაცემაში „შენი შუადღე“:
„საკუთარი თავისადმი სიყვარულით მოპყრობა მნიშვნელოვანია. საქართველოში საკუთარი თავის მოყვარულ ადამიანებად არ გვზრდიან. ნარცისიზმი საკუთარი თავის უკიდურესი არსიყვარულია. ეს უბრალოდ რაღაც გარკვეული როლის თამაშია. ყველაზე მეტად, ვისაც შეიძლება საკუთარი თავი არ უყვარდეს, ეს არის ნარცისი. ჩვენი თავის არმოყვარულ ადამიანებად გვზრდიან. საკუთარ თავს არაფერს არ შევუნდობთ ხოლმე. ლმობიერებით არ ვეპყრობით…
კრიტიკული შინაგანი ხმა გვაქვს და ამით ჩვენსავე თავს მუდმივად ვებრძვით.~
რას იტყვის მეზობელი? – ხშირად ეს არის ყველაზე აქტუალური. თვითსიყვარული უნდა ვისწავლოთ. ჩვენს კულტურაში ეს შეიძლება არ იყოს, მაგრამ თვითსიყვარულს სწავლა სჭირდება.
თვითსიყვარულის გამოვლინება არის ის, რომ ადამიანმა თავის თავს აპატიოს და შეუნდოს, რომ მას რაღაც ტიპის ემოციები და განცდები აქვს. უიმედობა გაქვს? – რა მოხდა, მერე?! ნუ დასჯი ამისთვის. არა მხოლოდ არ დასაჯო შენი თავი, არამედ შეეცადე, რომ შენს თავს ამ უიმედობისა და დეპრესიის დროს ისე მოეპყრა, როგორც საუკეთესო მეგობარს ან ოჯახის წევრს მოექცეოდი. უსაყვარლესი მეგობარი, ოჯახის წევრი რომ წარმოიდგინოთ, რომელიც თქვენთან დეპრესიული და უიმედო მოვიდა და გადაწყვიტეთ, რომ მასზე იზრუნოთ, დარწმუნებული ვარ, ზრუნვის უამრავი ფორმა გექნებათ.“
