რესპუბლიკურ საავადმყოფოს ეზოში ექიმები შეიკრიბნენ, რომლებმაც პრემიერ-მინისტრ ირაკლი კობახიძესა და საპარლამენტო უმრავლესობის ლიდერსა და „ქართული ოცნების“ აღმასრულებელ მდივანს მამუკა მდინარაძეს მადლობა გადაუხადეს. ექიმების განცხადებით, ისინი პირველები იყვნენ, ვინც დაინტერესდნენ მათი მდგომარეობით და მათი წინადადება გაითვალისწინეს.
„პრემიერმა ძალიან გულისყურით მოისმინა, ჩაერთო, გადაამოწმა სხვადასხვა საკითხი. გამოსავლით ძალიან დაინტერესდა. მიხარია, რომ ასეთი პრემიერი გვყავს, რომელსაც შეუძლია ასე ყოველგვარი თანამდებობის შეფერების, ქედმაღლობის გარეშე გაესაუბროს თავის მოსახლეობას. მადლობას ვუხდით პრემიერს, მთლიანად მთავრობას. მამუკა მდინარაძემ განსაკუთრებული როლი ითამაშა. მამუკა მდინარაძე ჩვენს ლობისტად გადაიქცა და დიდი მადლობა მას“, – განაცხადა რესპუბლიკური საავადმყოფოს ქირურგმა მალხაზ გოგუამ.
პრემიერ-მინისტრის გადაწყვეტილებით რესპუბლიკური საავადმყოფოს რეორგანიზაცია შეწყდა. ირაკლი კობახიძემ ჯანდაცვის მინისტრს მთავრობის დღევანდელ სხდომაზე დაავალა, მოკლე დროში წარადგინოს ახალი კონცეფცია, რომელიც წელსვე ახალი შენობის მშენებლობის დაწყებას გულისხმობს.
ირაკლი კობახიძე და მამუკა მდინარაძე კლინიკის თანამშრომლებს შაბათს შეხვდნენ.
პრემიერ-მინისტრი ირაკლი კობახიძე და „ქართული ოცნების“ აღმასრულებელი მდივანი, საპარლამენტო უმრავლესობის ლიდერი მამუკა მდინარაძე რესპუბლიკური საავადმყოფოს ექიმებს შეხვდნენ. მედპერსონალის განცხადებით, შეხვედრა პროდუქტიული იყო, პრემიერმა მოისმინა არგუმენტები, დასვა კითხვები, კონსულტაციები კი ხვალ გაგრძელდება.
დღეს კონკრეტული გადაწყვეტილება არ მიღებულა, ხვალ 16:00 საათზე უკვე ჯანდაცვის სამინისტროს წარმომადგენლებს მოუსმენენ.
„ყველა მტკივნეული საკითხი, რაც გვაწუხებდა და რისი თქმაც გვინდოდა, რა არგუმენტებიც გვქონდა, ყველამ აბსოლუტურად დაუფარავად მოვახსენეთ. ძალიან კმაყოფილები ვართ, იმიტომ რომ პრემიერ-მინისტრმა პირველი პირიდან გაიგო საწუხარი. ჩვენ ვუთხარით, რომ სანამ დემონტაჟი გადაწყდება, სანამ პროექტები და საქმიანი წინადადებები წამოვა, მანამდე შეჩერდეს ბრძანება რესპუბლიკური საავადმყოფოს რეორგანიზაციის შესახებ“, – განაცხადა ექიმმა, ნინო ოთარიშვილმა.
„ძალიან ყურადღებით გვისმენდა, შეკითხვებსაც სვამდა. მე ვთვლი, რომ ის, რისი გაგებაც უნდოდა, ყველაფერი გაიგო. რა თქმა უნდა, ერთი შეხვედრის შემდეგ მაშინვე გადაწყვეტილებას ვერ გამოაცხადებდა. ჩვენ იმედი გვაქვს, რომ გადაწყვეტილება იქნება ქვეყნისთვის და ყველასთვის სასიკეთო“, – აღნიშნა ექიმმა, მალხაზ გოგუამ.
#datashvil #drpkhakadze #sheniganatleba #sheniambebi #sheniekimi
