ჯანდაცვის მინისტრის მოადგილემ, ილია ღუდუშაურმა DRG მოდელის მოქმედების შესახებ „ქრონიკაში“ ისაუბრა.
საქართველოში DRG-ი დაფინანსების მოდელი 1 წელზე მეტია მოქმედებს, 1 თვეა დაფინანსების ეს სისტემა გავრცელდა მშობიარობის დაფინანსებაზეც. ამ დროის განმავლობაში, სრულად, დაფინანსდა დაახლოებით 2 200 მშობიარობა.
აქამდე დაფინანსება ფიზიოლოგიური მშობიარობის შემთხვევაში 500 ლარი, საკეისროს შემთხვევაში კი 800 ლარი იყო, ამასთან, თითქმის ყველა მშობიარეს უწევდა თანაგადახდა. დღეის მდგომარეობით, მომსახურება ფინანსდება სრულად, პაციენტის მიერ თანაგადახდის გარეშე.
სამინისტროს მიერ, კლინიკებისგან მოხდა ხარჯებთან დაკავშირებული ინფორმაციის გამოთხოვა, როგორც მშობიარობა/საკეისრო კვეთის, ისე ექიმის მომსახურების, გაუტკივარების საფასურისა და სხვა. მათ მიერ მოწოდებული ინფორმაციის შესაბამისად, განისაზღვრა ახალი ტარიფი 1220 ლარის ოდენობით და ყველა კლინიკისთვის ერთიანი სატარიფო არეალი ჩამოყალიბდა.
ე.წ. აყვანილი ექიმის მომსახურების ანაზღაურება გათვალისწინებულია იმ ტარიფში, რომელიც დაწესდა სამინისტროს მიერ. შესაბამისად, ამ სერვისის გამო, არც ერთ კლინიკას არ აქვს უფლება პაციენტი, გაიყვანოს დაფინანსების DRG მოდელიდან.
