ანგიოლოგია-ანგიოქირურგიის აკადემიური კლინიკა დაარსდა 1997 წელს მედიცინის მეცნიერებათა დოქტორის, პროფესორ გია აბზიანიძის ხელმძღვანელობით
ამ ეტაპზე კლინიკას ხელმძღვანელობს სისხლძარღვთა ქირურგიის წამყვანი სპეციალისტი , მედიცინის მეცნიერებათა დოქტორი, პროფესორი იგორ მიქაძე . კლინიკა თანამედროვე სტანდარტების დონეზე აწარმოებს სხვადასხვა სპექტრის სამედიცინო დახმარებას ანგიოლოგიასა და სისხლძარღვთა ქირურგიაში. კლინიკა 1998 წლიდან თანამშრომლობს ბერლინის სისხლძარღვთა ქირურგიის კლინიკასთან, გერმანელი კოლეგები ყოველ წელს ჩამოდიან თბილისში და ქართველ ექიმებთან ერთად ატარებენ კონსულტაციებს. ასევე კლინიკის თანამშრომლები გადიან სტაჟირებას და იმაღლებენ კვალიფიკაციას ბერლინის კლინიკაში.
კლინიკის ძირითადი მიმართულებებია ათეროსკლეროზულად დაზიანებული სისხლძარღვების, დიაბეტური ტერფის, ვენური უკნარისობის და ლიმფოსტაზის მწვავე და ქრონიკული ფორმების კონსერვატიული და ქირურგიული მკურნალობა, ასევე ანგიოპათიების, ვასკულიტების, მალფორმაციების, თრომბოფლებიტების, პოსტთრომბოზული პათოლოგიებისა და ტროფიული წყლულების მკურნალობა.
ჩვენი კლინიკისთვის ერთ-ერთ პრიორიტეტს წარმოადგენს შაქრიანი დიაბეტის ისეთი სერიოზული გართულება, როგორიცაა დიაბეტური ტერფის სინდრომი. ჩვენს კლინიკაში შაქრიანი დიაბეტით დაავადებული პაციენტები შეიძლება ჩაერთონ სახელმწიფო პროგრამაში „დიაბეტის მართვა“, რომლის მიზანია შაქრიანი დიაბეტით დაავადებული პაციენტების ამბულატორიული მეთვალყურეობის გაუმჯობესება შესაძლო გართულებების პრევენცია და სრულყოფილი მკურნალობის დანიშვნა.
თანამედროვე ტექნოლოგიები, სრულყოფილი მატერიალურ-ტექნიკური ბაზა, დიაგნოსტიკისა და მკურნალობის უახლესი მეთოდები, სათანადო კლინიკო-ბიოქიმიური ლაბორატორია, მაღალი დონის მომსახურეობა განსაზღვრავს კლინიკის წარმატებულ მუშაობას. მნიშვნელოვანია აქ შექმნილი გულთბილი და კომფორტული გარემო.
