საქართველოს საზოგადოებრივი ჯანდაცვის ინსტიტუტის ხელმძღვანელი, ჯანდაცვის ექსპერტი, პროფესორი გიორგი ფხაკაძე დეპუტატ ნინო წილოსანს მადლობას უხდის.
„ქალბატონო ნინო წილოსანი, გულწრფელ მადლობას გიხდით პარლამენტის კომისიაში წამლების ბაზართან დაკავშირებული მნიშვნელოვანი საკითხების განხილვისთვის.
აღნიშნული თემა წლების განმავლობაში წარმოადგენს სერიოზულ გამოწვევას და განსაკუთრებით მნიშვნელოვანია, რომ იგი დღეს უკვე სისტემურ დონეზე განიხილება. საუბარია პრობლემებზე, რომლებიც პირდაპირ აზიანებს პაციენტების ინტერესებს — წამლების მაღალი ფასები, არაკეთილსინდისიერი კონკურენცია, სააფთიაქო ქსელების მხრიდან საკუთარი პროდუქციის პრიორიტეტიზაცია, ასევე არასაჭირო მედიკამენტების დანიშვნის პრაქტიკა.
ეს ყველაფერი საბოლოოდ იწვევს მოსახლეობის ჯიბიდან გადახდების ზრდას და ამძიმებს სოციალური და ჯანდაცვის სისტემის მდგომარეობას. განსაკუთრებით საყურადღებოა პროფესიული ეთიკის საკითხიც — აუცილებელია, რომ მკურნალობა ეფუძნებოდეს მხოლოდ პაციენტის საჭიროებას და სამეცნიერო მტკიცებულებებს, ყოველგვარი კომერციული გავლენების გარეშე.
დარწმუნებული ვარ, რომ თქვენი ლიდერობითა და პრინციპული მიდგომით შესაძლებელია ამ სფეროში რეალური და მდგრადი ცვლილებების განხორციელება. იმედი მაქვს, აღნიშნული პროცესები გაგრძელდება და გადაიზრდება კონკრეტულ გადაწყვეტილებებსა და ეფექტიან რეფორმებში. კიდევ ერთხელ მადლობა ამ მნიშვნელოვანი საკითხის წინ წამოწევისთვის“.
პატივისცემით,
გიორგი ფხაკაძე
