რომელ დაავადებებს შეიძლება უკავშირდებოდეს ქოშინი, სუნთქვის გაძნელება?
საუბრობს თერაპევტი ლიზა გოდერძიშვილი გადაცემაში „პირადი ექიმი“:
„ქოშინი გახშირებული სუნთქვაა. საშუალოდ, წუთში სუნთქვა 12-დან 20-მდეა. ამას რომ გადააჭარბებს, სწრაფად სუნთქვა რომ სურს, იმისთვის, რომ ორგანიზმის ჟანგბადის მოთხოვნილება დააკმაყოფილოს, ამას ქოშინი ჰქვია.
შესაძლოა, სუნთქვის გაძნელება სუნთქვის სიხშირის მატებასთან დაკავშირებული არ იყოს და ადამიანს ჩასუნთქვა ან ამოსუნთქვა უძნელდებოდეს. ამის კლასიკური მაგალითია ასთმა. შესაძლებელია, გახშირებული სუნთქვა არ ჰქონდეს, მაგრამ შეტევის დროს მას ძლიერად გახანგრძლივებული ამოსუნთქვა აქვს. ამოსუნთქვას თან ახლავს სტვენა, ანუ მისი სუნთქვა ხმაურიანია. ეს სუნთქვის გაძნელების კლასიკური მაგალითია, რასაც დაავადება იწვევს. სუნთქვის გაძნელების ფსიქოემოციური მაგალითიც არსებობს, როცა ადამიანი ამოსუნთქვას ბგერის გამოცემასთან ასოცირებულს ხდის. ქართულ ენაში ამას ხვნეშას, ოხვრას ვუწოდებთ.
პირველ რიგში, უნდა განისაზღვროს, რა არის ამოსუნთქვა და რა – ჩასუნთქვა. ამოსუნთქვას ხშირად ჩასუნთქვას არქმევენ იმიტომ, რომ რაკი ,,ა“-ს ვამბობთ და პირს ვაღებთ, რატომღაც ეს აქტი ამოსუნთქვასთანაა დაკავშირებული. სინამდვილეში, ეს ჩასუნთქვაა იმიტომ, რომ ორგანიზმში ჰაერი ჩადის. როცა ორგანული პათოლოგია არ არის და ეს შეიძლება შფოთვასთან ასოცირდებოდეს, როცა ადამიანი ფსიქოემოციური დატვირთვის ფონზე გაძლიერებულად სუნთქავს, ამ დროს ყველაზე ხშირად შესაძლოა, ჩასუნთქვის პროცესი გაძნელდეს. ეს ძალიან დიდ პროცენტში ფსიქოემოციურ მომენტებთანაა დაკავშირებული. სუნთქვის სერიოზული გაძნელება, პათოლოგია, ძალიან საყურადღებოა.“
მასალის გამოყენების პირობები
