რა კავშირია არტერიულ წნევასა და ინსულტის განვითარებას შორის?
გადაცემაში „პირადი ექიმი“ ნევროლოგი, პროფესორი ალექსანდრე ცისკარიძე საუბრობს:
„როდესაც რომელიმე დაავადების რისკ ფაქტორსა და მის გამოვლენაზე, მის შესახებ ცნობადობის ამაღლებაზე ვსაუბრობთ, ვფიქრობ, ეს უმნიშვნელოვანესი ღონისძიებაა, რადგანაც რისკის ფაქტორების სწორი აღქმა გვაძლევს საშუალებას, ვიმოქმედოთ და მძიმე დაავადების პრევენცია შევძლოთ. ამ შემთხვევაში საუბარია ინსულტზე, რომელიც მოზრდილთა ასაკის ერთ-ერთი ყველაზე მძიმე დაავადებაა.
სიკვდილიანობის მაჩვენებლის მიხედვით,გულის კარდიალური პათოლოგიის შემდეგ, მეორე ადგილზეა. რაც შეეხება ფუნქციური უნარშეზღუდულობის გამოწვევას, ამ შემთხვევაში, უდავო „ლიდერია“.
არტერიული ჰიპერტენზია ინსულტის განვითარების ერთ-ერთი ყველაზე მძლავრი ფაქტორია.
ინსულტი ორი სახის არსებობს: იშემიური, ანუ ტვინის ინფარქტი, რომელიც ტვინის მკვებავი სისხლძარღვის დახშობითაა გამოწვეული. ჰემორაგიული ინსულტი გახლავთ, რომელიც ტვინის მკვებავი სისხლძარღვის მთლიანობის დარღვევით ვითარდება. ორივე ფორმა ძალიან მძიმეა, განსაკუთრებით ჰემორაგიული ინსულტი, რომელსაც უფრო მაღალი სიკვდილიანობის მაჩვენებელი ახასიათებს. საშუალოდ, 80% – 20%-თან თანაფარდობაა.
ორივე შემთხვევაში გვაქვს ინსულტი, გნებავთ ჰემორაგიული, გნებავთ იშემიური, რომელიც არტერიული ჰიპერტენზიის შედეგია. თუ თავად ჰიპერტენზიის ინსულტის განვითარებაზე გავლენაზე ვისაუბრებთ, მას მხოლოდ რისკის ფაქტორის როლი არ აქვს. ის ეტიოლოგიური ფაქტორია, რაც იმას ნიშნავს, რომ ჰიპერტენზიის მქონე პაციენტებში ვითარდება წინაპირობები, რომლებიც შემდგომში ინსულტს იწვევს.“
