2024 წლის 26 მარტს “აკრედიტაცია კანადას” წარმომადგენლობის ოფიციალური შეხვედრა გაიმართა ,,წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს” მედ-პერსონალთან და მენეჯმენტთან.
“აკრედიტაცია კანადა”, რომლის წარმომადგენელი საქართველოში ჯანდაცვის საერთაშორისო ექსპერტი, პროფესორი გიორგი ფხაკაძეა, საქართველოს 20-ზე მეტი კლინიკის აკრედიტაციის პროცესშია ჩართული.
ამჟამად “აკრედიტაცია კანადას” წარმომადგენლობა, გიორგი ფხაკაძის ხელმძღვანელობით, საქართველოშია და კლინიკებთან შეხვედრებს მართავს.
“შენი პულსი” ესაუბრა “წმინდა მიქაელ მთავარანგელოზის სახელობის კლინიკური საავადმყოფოს” საერთაშორისო ხარისხის მართვის მენეჯერს, აკრედიტაცია კანადის მიმართულებით, აუდიტორ ნინო ენდელაძეს:
“ამ ეტაპზე აქტიური კომუნიკაცია მაქვს საერთაშორისო ორგანიზაცია “აკრედიტაცია კანადასთან”.
დღევანდელი შეხვედრა ემსახურება პრაქტიკულ სამუშაო მოდელს, რომელიც განსაზღვრავს საერთაშორისო სტანდარტის დანერგვის ტექნიკას, მიმართულებებს, ძირითად ასპექტებს.
ჩვენთან არის ბატონი ალექსანდრე ბურიანი,რომელიც დეტალურად გვიხსნის სამუშაო პროცესს – როგორ უნდა ვიყოთ ჩართული პროცესში, რა ევალებათ სამედიცინო დაწესებულებებს საკუთარი ხარისხის განვითარებისათვის, რომ უწყვეტი სამედიცინო მომსახურების მიწოდებაში აქტიურად განვავითაროთ ხარისხი – სწორად ამას უზრუნველყოფს აღნიშნული პროგრამა.
ჩვენ აქტიურად ვთანამშრომლობთ აკრედიტაცია კანადასთან, ჩვენი პრიორიტეტი იყო ის, რომ აკრედიტაციის სხვა ორგანიზაციებისგან განსხვავებით, “აკრედიტაცია კანადას” ჰყავს ქართული ჯგუფი, რომელიც დატრენინგებულია და ქართულ ენაზე გატარდა ის ღონისძიებები, რაც ძალიან დიდი კომფორტია სამედიცინო ბაზარზე.
ეს პროგრამა სამედიცინო პერსონალისთვის არის კომფორტული იმიტომ, რომ მარტივად გასაგებია.
ხელმისაწვდომობა ყველანაირი სტანდარტის და მათი მიყვანა მედპერსონალამდე, პაციენტამდე, მოსახლეობამდე – ეს არის ჩვენი პრიორიტეტი.
სწორედ ამიტომ, ჩვენ ერთობლივად ვთანამშრომლობთ, გავაგრძელებთ კიდევ თანამშრომლობას და შესაბამისად, ეს დადებითი მხარე მინდა აღვნიშნო, რომ “აკრედიტაცია კანადამ” ძალიან ბევრი რამ გააკეთა სამედიცინო მიმართულების განსავითარებლად… ვცდილობთ, რომ 2-3 წელიწადში ხარისხიანი სამედიცინო მომსახურება გვქონდეს საქართველოში, რათა არ მოხდეს პაციენტების გადინება საზღვარგარეთ. აქ შევქმნათ ის სერვისები სამედიცინო მომსახურებისა, რომელიც მნიშვნელოვანია განვითარებისთვის.
რაც შეეხება ჩვენს კლინიკას, მისი ისტორია თითქმის ორ საუკუნეს ითვლის. ოფიციალურად 1868 წელს გაიხსნა, მაგრამ პირველი ჩანაწერები არქივში 1844 წლით თარიღდება. ჩვენს სამედიცინო დაწესებულებასთან გარდაიცვალა ნიკო ფიროსმანი… ასევე, ამ დაწესებულებაში მკურნალობდა არაერთი გამოჩენილი ადამიანი და ჩვენ გვინდა, რომ ეს საუკუნოვანი ისტორია იყოს ჩვენი გზამკვლევი მომავალში.
გამომდინარე იქიდან, რომ ხარისხი უნდა გავაუმჯობესოთ, ჩვენ არ გვსურს, ამ ისტორიული ხაზის გამო სამედიცინო კლინიკამ შეაჩეროს განვითარება, პირიქით, ეს არის ჩვენი სტიმული, რომ განვვითარდეთ. ჩვენს მისიას წარმოადგენს ხარისხიანი ჯანდაცვა, მედპერსონალის კვალიფიკაციის ამაღლება, რომ კმაყოფილების ინდექსი იყოს მაღალი და ჯანსაღ გარემოში გაეწიოთ პაციენტებს სრული მომსახურება.
აქედან გამომდინარე, ჩვენ არა მხოლოდ აკრედიტაციისა და საერთაშორისო სტანდარტების დახმარება გვინდა, არამედ სამინისტროსთანაც ვცდილობთ აქტიურ კომუნიკაციას, თანამშრომლობის ფარგლებში და კიდევ ერთხელ, ვაწარმოებთ მოლაპარაკებებს, რომ აქტიურად
იყვნენ ჩართულები ჩვენი სამედიცინო სფეროს განვითარებაში.
ჩვენი პრიორიტეტი არის ის, რომ მრავალსაუკუნოვანი გამოცდილება მივიყვანოთ თანამედროვე სტანდარტებამდე და საერთაშორისო ხარისხის სამედიცინო მომსახურება გავუწიოთ პაციენტებს.
“აკრედიტაცია კანადა” იყო სტიმული ჩვენი კლინიკის რებრენდინგისა. რადგანაც საუკუნოვან საქმიანობას ვეწევით, არ გვაქვს უფლება, არ განვვითარდეთ. და ეს რეკომენდაცია სწორედ “აკრედიტაცია კანადისგან” მივიღეთ.
მასალის გამოყენების პირობები
