საქართველოში გვაქვს იმის ფუფუნება, რომ გადავწყვიტოთ – ზღვის სანაპიროზე გვირჩევნია ჩვენი შვებულებისა და არდადეგების გატარება თუ მთაში, რადგან კურორტები ორივეში მრავლად გვაქვს. საქართველო საოცარი ლანდშაპტით გამოირჩევა, რომელიც მთას, ზღვას, ტყეებსა და საკურორტო ზონებს მოიცავს. მთის რეკრეაციული ზონებიდან ისეთი ადგილები სარგებლობს პოპულარობით, სადაც შეძლებთ გაექცეთ ზაფხულის სიცხეს და ასევე ისიამოვნოთ დასვენებით. მოდი, ვნახოთ, რა დაგიჯდებათ დასვენება საქართველოს ცნობილ კურორტებზე.
არაჩვეულებრივი ხედებით ტკბობა, უგემრიელესი კერძების დაგემოვნება და სასიამოვნო დასვენება შეგიძლიათ სვანეთში. მესტიასა და მესტიასთან ახლოს მდებარე სოფლებში საოჯახო ტიპისა და სტანდარტულ სასტუმროებთან ერთად ასევე განლაგებულია პატარა ქოხები, სადაც ტურისტსა და დამსვენებელს შეუძლია დარჩენა. ფასები იმის მიხედვით მერყეობს, თუ სად დარჩებით. თუმცა სვანეთში ყველგან ულამაზესი ხედებია გადაშლილი, ამიტომ სადაც არ უნდა დარჩეთ, პანორამა თქვენ თვალწინ უთუოდ გადაიშლება. სასტუმროში განთავსება კომფორტულია, თუმცა საოჯახო სასტუმროზე ძვირია. მესტიის სასტუმროებში 5 ღამის გატარება 800-იდან 900 ლარამდე შეგიძლიათ, საოჯახო სასტუმროებში კი 250-იდან 400-ამდე. რაც შეეხება ქოხებს, ქოხებში დასვენება ერთი ღამე 25-30 ლარი ღირს, რომელშიც არ შედის კვება. ამიტომ თავად მოგიწევთ უზრუნველყოთ საკუთარი კვება, რაც კიდევ უფრო მეტი თანხის დამატებას მოითხოვს.
ერთ-ერთი ყველაზე პოპულარული მხარეა რაჭა, სადაც ყველაზე მოთხოვნადი კოტეჯებია. დამსვენებელს რაჭაში მრავალფეროვანი სანახაობა ელოდება, შაორის ზურმუხტოვანი ტბა, სამონასტრო კომპლექსები, სიმწვანეში ჩაფლული კურორტები და ა.შ. კოტეჯების საშუალო ღირებულება ერთი ღამის შემთხვევაში 150 ლარია, სადაც დამსვენებლისათვის ყველანაირი კომფორტია შექმნილი. ასევე, რაჭაში ქირავდება აგარაკები, საოჯახო სასტუმროები, რომელთა ფასები დღიური ან თვის მანძილზე ქირაობით განსხვავდება. ერთ პერსონაზე ერთი ღამე საშუალოდ 50-100 ლარია.
ვისაც მთა უყვარს, ყაზბეგი შესანიშნავი ვარიანტია. იგი პოპულარული კურორტების სიაშია. ყაზბეგში დასვენებას შეძლებთ როგორც სასტუმროებში, ასევე–საოჯახო სასტუმროებში. ყაზბეგის სასტუმროებში 5 დღის განმავლობაში შეძლებთ 800-იდან 1000ლარამდე დაისვენოთ. ფასები განპირობებულია რამდენოთახიანი ბინა გინდათ, აივნით თუ აივნის გარეშე და ა.შ. ხოლო საოჯახო სასტუმროებში შეძლებთ 300-იდან 500 ლარამდე დასვენებას.
შედარებით ახლოს არის კურორტები: საირმე, ბორჯომი, ბაკურიანი. ამ ადგილებზე ძირითადად მცირე ასაკის ბავშვიანი ოჯახები გამოირჩევიან. ამ კურორტებზე ხელმისაწვდომია როგორც სტანდარტული, ასევე საოჯახო სასტუმროებიც. ბორჯომი საამკურნალო ზონაა.ყველაზე მთავარი მინერალური წყლებია, რომელიც მდიდარია ორგანიზმისთვის საჭირო ელემენტებით. ძირითადად ამ კურორტებზე სასტუმროებში დასვენებას ერთ ღამით 100-ლარიდან შეძლებთ, ხოლო საოჯახო სასტუმროებში 50-60 ლარად.
ვინც თბილისთან ახლოს გეგმავს დასვენებას, კოჯორს, საბადურის ტყის მიმდებარე კოტეჯებსა და ბაზალეთის ტბის შემოგარენში გირჩევდით დასვენებას. ასევე, დროის გატარება შესანიშნავად შეგიძლიათ საგურამოშიც.
მოდი, გავიგოთ, რას ფიქრობს თბილისის მოსახლეობა მთაში დასვენებაზე, რომელს ანიჭებენ უპირატესობას – მთას თუ ზღვას?
მართა, 23 წლის
–რომელ კურორტებზე დასვენებას ანიჭებთ უპირატესობას, მთას თუ ზღვას?
-უკვე სამი ზაფხულია , მე და ჩემი მეგობრები ზღვაზე დავდივართ. თუმცა წელს გადავწყვიტეთ, რომ ბაკურიანი არა მარტო ზამთარში, არამედ ზაფხულშიც მოგვენახულებინა, ამიტომ ბაკურიანში გადავწყვიტეთ დასვენება.
ლაშა, 35 წლის
-სიმართლე გითხრათ, ზღვაც მიყვარს და მთაც, ასერომ, გამორჩევა არ შემიძლია, ორივე საუკეთესოა დასვენებისთვის. მთაში ჰაერის გამოცვლა ნამდვილად კარგია ყველასთვის.
ნათია, 38 წლის
-მთაში დასვენება ბავშვობიდან მიყვარს. ზაფხულობით მთელი ოჯახი ერთად ვიკრიბებოდით და რაჭაში ვისვენებდით. წელს არ ვიცი, მაგრამ დიდი იმედი მაქვს, წელსაც შევძლებ წასვლას და სასიამობნოდ გავატარებ ამ ზაფხულს.
ვერა, 27 წლის
-საქართველო მართლაც გამოირჩევა კურორტებით. ჩვენი ქვეყანა შესაძლებლობას გაძლევს დაისვენო შესანიშნავ კურორტებზე როგორც ზღვაზე, ასევე – მთაში. მე წელს ზღვაზე ვაპირებ დასვენებას, მაგრამ მთაშიც არაერთხელ ვყოფილვარ, არ შემიძლია არ გამოვყო სვანეთი, რომლის თითოეული კუთხეც ულამაზესია და შესანიშნავი ბუნებაა.
