საფრანგეთის სახელმწიფო ენერგოკომპანია Électricité de France (EDF) ქვეყნის მასშტაბით სკოლების, ბაგა-ბაღებისა და საბავშვო ცენტრების გაგრილების სისტემების გასაუმჯობესებლად 80 მილიონ ევროს გამოყოფს.
ინიციატივის მიზანია საგანმანათლებლო დაწესებულებების მომზადება იმ ექსტრემალური სიცხის ტალღებისთვის, რომლებიც კლიმატის ცვლილების ფონზე სულ უფრო ხშირი და ინტენსიური ხდება.
პროგრამა მოიცავს როგორც სწრაფი გამოყენების ტექნიკის შეძენას, ისე ინფრასტრუქტურის გრძელვადიან განახლებას. პირველ ეტაპზე 40 მილიონი ევრო დაიხარჯება ვენტილატორების, წყლის მფრქვეველი სისტემების, პორტატული და სტაციონარული კონდიციონერების შესაძენად. თითოეულ დაწესებულებას, საჭიროების მიხედვით, მაქსიმუმ 10 პორტატული კონდიციონერი გადაეცემა.
დარჩენილი 40 მილიონი ევრო კი შენობების მოდერნიზაციას მოხმარდება. მათ შორის გათვალისწინებულია ორმხრივი მოქმედების თბური ტუმბოების დამონტაჟება და სხვა ტექნიკური გადაწყვეტილებები, რომლებიც დაწესებულებებს მომავალში მაღალი ტემპერატურის პირობებში მუშაობის გაგრძელების შესაძლებლობას მისცემს.
EDF-ის ხელმძღვანელის, ბერნარ ფონტანას განცხადებით, პროექტის მთავარი მიზანია ბავშვებისა და საგანმანათლებლო დაწესებულებების თანამშრომლებისთვის უსაფრთხო გარემოს შექმნა.
„სიცხის ტალღები უკვე ჩვენი ყოველდღიურობის ნაწილია. სწორედ ამიტომ გადავწყვიტეთ, სკოლებს, ბაგა-ბაღებსა და საბავშვო ცენტრებს დავეხმაროთ როგორც სწრაფი რეაგირების საშუალებებით, ისე ისეთი ინფრასტრუქტურით, რომელიც მომავალშიც ეფექტიანი იქნება,“ — განაცხადა ფონტანამ.
საფრანგეთში ბოლო კვირების განმავლობაში ჰაერის ტემპერატურამ არაერთ რეგიონში 40°C-ს გადააჭარბა, რის გამოც განსაკუთრებით რთული მდგომარეობა შეიქმნა სკოლებსა და სხვა საჯარო დაწესებულებებში.
განათლების სფეროს პროფკავშირებმა თანამშრომლებს მოუწოდეს, საჭიროების შემთხვევაში, გამოიყენონ გაფიცვის უფლება და მოითხოვონ უსაფრთხო სამუშაო პირობები. მათი შეფასებით, მოქმედი ინფრასტრუქტურა სიცხის ტალღებთან გასამკლავებლად კვლავ არასაკმარისია.
პროფკავშირების განცხადებით, პედაგოგებსა და სხვა თანამშრომლებს მძიმე პირობებში უწევთ სასწავლო პროცესის შენარჩუნება, მაშინ როდესაც კლიმატის ცვლილების გამო მაღალი ტემპერატურის ეპიზოდები ყოველწლიურად უფრო ხშირი ხდება.
2025–2026 სასწავლო წლის მიხედვით, საფრანგეთის საჯარო სკოლებში საზაფხულო არდადეგები 4 ივლისს იწყება და 30 აგვისტოს დასრულდება, ხოლო საზაფხულო საგანმანათლებლო პროგრამები ივნისის ბოლოდან აგვისტოს ბოლომდე გაგრძელდება.
მეცნიერთა საერთაშორისო ჯგუფმა World Weather Attribution განაცხადა, რომ ზაფხულის ასეთ ადრეულ ეტაპზე მსგავსი მასშტაბის სიცხის ტალღა კლიმატის ცვლილების გარეშე პრაქტიკულად შეუძლებელი იქნებოდა.
მსოფლიო ჯანდაცვის ორგანიზაციის გენერალურმა დირექტორმა, ტედროს ადჰანომ გებრეიესუსმა, კიდევ ერთხელ გააფრთხილა საზოგადოება, რომ ევროპა მსოფლიოში ყველაზე სწრაფად დათბობადი კონტინენტია და მისი საშუალო ტემპერატურა გლობალურ მაჩვენებელთან შედარებით დაახლოებით ორჯერ სწრაფად იზრდება.
ჯანმოს მონაცემებით, 21 ივნისის შემდეგ ევროპაში 1 300-ზე მეტი ადამიანი გარდაიცვალა სიცხესთან პირდაპირ ან ირიბად დაკავშირებული მიზეზებით. მათ შორის იყვნენ ბავშვები, რომლებიც დახურულ ავტომობილებში დარჩნენ, და ახალგაზრდები, რომლებიც გაგრილების მიზნით არაკონტროლირებად წყალსატევებში ბანაობისას დაიხრჩვნენ.
ერთ-ერთ ყველაზე დაზარალებულ ქვეყნად კვლავ საფრანგეთი რჩება. ქვეყნის ჯანდაცვის ეროვნულმა სააგენტომ განაცხადა, რომ 24 ივნისის შემდეგ მოსალოდნელზე დაახლოებით 1 000-ით მეტი გარდაცვალების შემთხვევა დაფიქსირდა, რომელთა უმრავლესობა 65 წლის და უფროსი ასაკის ადამიანებზე მოდის.
პარიზის ხელისუფლებამ საგანგებო სამსახურებზე დატვირთვის შესამცირებლად შაბათ-კვირას საზოგადოებრივ ადგილებში ალკოჰოლის მოხმარება დროებით აკრძალა, გადაიდო ქალაქის პრაიდ-მარშიც, ხოლო ეიფელის კოშკმა და ლუვრის მუზეუმმა ვიზიტორებისთვის მუშაობა ჩვეულებრივზე ადრე შეწყვიტეს.
