მაშველებმა მდინარე მტკვარში გადავარდნილი ავტომობილი და მასში მყოფი ორი მგზავრის ცხედარი იპოვეს. ერთ-ერთი გარდაცვლილი, სავარაუდოდ, უტა ელიავაა, რომლის ცხედარი ახლობლებმა ამოიცნეს. მეორე ცხედრის ვინაობა ჯერ არ არის დადგენილი.
შემთხვევა 14 მაისს, გამთენიისას, მტკვრის მარცხენა სანაპიროზე მოხდა, როდესაც ავტომობილი მდინარეში გადავარდა. ავტომობილში ოთხი ადამიანი იმყოფებოდა. მათგან ერთი მაშველებმა მალევე გადაარჩინეს, ხოლო ორი გარდაცვლილი იპოვეს. მესამე მგზავრის, 23 წლის გიორგი შამუგიას, ძებნა ამ დრომდე გრძელდება.
გადარჩენილი მგზავრის მონათხრობით, გიორგი შამუგია ცდილობდა ნაპირისკენ მოცურავებას, მაგრამ მას მანქანა დაეჯახა, რის შემდეგაც აღარ დაუნახავთ. “გადარჩენილმა ბიჭმა, გიგას მეგობარმა თქვა, დავინახე ნაპირისაკენ მოცურავდა, მაგრამ ის მანქანა დაეჯახა, რომელშიც ვისხედით, დინებას მიჰქონდაო მანქანა და იმან გადაუარა, მერე აღარ მინახავსო”, — ამბობს ახლობელი.
ავტომობილის პოვნა შესაძლებელი გახდა მას შემდეგ, რაც მტკვრის კალაპოტში წყლის დონის ხელოვნური შემცირება განხორციელდა. შინაგან საქმეთა სამინისტროს ინფორმაციით, ავტომობილი წყალში უკნიდან შეჯახების შედეგად გადავარდა. მომხდარ ავარიაში მონაწილე მძღოლი, 2002 წელს დაბადებული ი.ს., სამართალდამცავებმა დააკავეს. “ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, თბილისში, მტკვრის მარცხენა სანაპიროზე მომხდარ ავტოსაგზაო შემთხვევაში მონაწილე მძღოლი 2002 წელს დაბადებული ი.ს. დააკავეს. გამოძიებით დადგინდა, რომ ი.ს.-მ მისი მართვის ქვეშ არსებული ავტომობილით გადაადგილებისას, ავარიული ვითარება შეუქმნა სხვა ავტომობილს, რომლის მძღოლმაც საჭე ვერ დაიმორჩილა და მდინარე მტკვარში გადავარდა”, — აცხადებენ უწყებაში.
გარდაცვლილი უტა ელიავას მეუღლემ, გვანცა გოროზიამ, სოციალურ ქსელში ემოციური პოსტი გაავრცელა:
“უტი, ასე გაგვახარე შენი მოსვლით… აქ წერით ვიმშვიდებ გულს, უტი, მე შენ გელოდები.… შენი გულგახეთქილი დედა გელოდება, უტა. შვილებზე უზომოდ შეყვარებული მამა დამიბრუნდი. მე უშენოდ სუნთქა მიჭირს. უშენოდ არაფერი ვარ, უტი, ჩემო სამუდამო და უსასრულოო სიყვარულო, გელოდები.
მე შენ გარეშე ხომ იცი არ შემიძლია, უტი, გელოდები”, — დაწერა გვანცა გოროზიამ და გაავრცელა ვიდეო, სადაც ჩანს მისი მოულოდნელი მისვლით როგორ გაახარა ოჯახი და მისი პატარები.
„ბოლოჯერ გნახე უტი აქ… შენს ბიჭებთან მოხვედი და ნახევარ საათში წახვედი, უტა, მეჩქარებაო, უნდა დავბრუნდეო, რატომ გაგიშვი, რამდენი გაკოცე და ჩაგეხუტე. მალე მოვალო, ჩემო სიცოცხლეო – მითხარი, მე გელოდები, მოდი“, – წერს გვანცა გოროზია და მეუღლესთან ერთად გადაღებულ კადრებს აქვეყნებს.
სამძებრო-სამაშველო ოპერაციაში ჩართულია საგანგებო სიტუაციების მართვის სამსახურის მეხანძრე-მაშველები, მყვინთავთა ჯგუფი, წყლის საშუალებები და შინაგან საქმეთა სამინისტროს შესაბამისი დანაყოფები. მესამე მგზავრის ძებნა უწყვეტ რეჟიმში გრძელდება.
