სუროგატი დედის მშობიარობა/საკეისრო კვეთის ხარჯებს სახელმწიფო აღარ დააფინანსებს. ამის შესახებ მთავრობის დადგენილება 1-ელ მარტს გამოქვეყნდა.
„საყოველთაო ჯანმრთელობის დაცვის სახელმწიფო პროგრამის ფარგლებში არ ანაზღაურდება სუროგატული დედის მშობიარობა/საკეისრო კვეთის ხარჯები,“- ნათქვამია დოკუმენტში.
შეგახსენებთ, რომ მთავრობას დაგეგმილი ჰქონდა საქართველოში უცხოელებისთვის ინ ვიტრო განაყოფიერება და სუროგაცია აკრძალულიყო და ამ გზით მხოლოდ საქართველოს მოქალაქეებს შესძლებოდათ ბავშვის გაჩენა. აღნიშნულთან დაკავშირებით გასულ წელს პარლამენტში კანონპროექტიც დაინიცირდა, თუმცა, სუროგაციისა და ინვიტრო განაყოფიერების წესების გამკაცრების შესახებ კანონპროექტი მესამე მოსმენიდან მოიხსნა.
სერვისების განვითარების სააგენტოს 2023 წლის მონაცემებით, ქვეყნის მასშტაბით, 3 036 სუროგატი დედაა რეგისტრირებული. ამასთან, 2012 წლიდან 2023 წლის ნოემბრის ჩათვლით პერიოდში სუროგაციის გზით საქართველოში 5 393 ბავშვი დაიბადა.
მასალის გამოყენების პირობები
