სვანეთში დაკარგული მოქალაქეები აქამდე არ უპოვიათ
რთული მეტეოროლოგიური პირობები ძებნის პროცესში შეფერხებას უწყობს
სვანეთის რეგიონის მესტიისა და ლენტეხის ტერიტორიაზე უკვე მეორე დღეა, ორ დაკარგულ მოქალაქეს ეძებენ. საგანგებო სიტუაციების მართვის სამსახურის ინფორმაციით, ძებნა-შველის ოპერაციაში ჩართული არიან თბილისის, იმერეთისა და მესტიის სამთო სამაშველო ძალები, შსს-ის ყველა შესაბამისი დანაყოფი და სამაშველო დრონები. თუმცა, ვერტმფრენის ჩართვა მეტეოროლოგიური პირობების გამო ვერ ხერხდება.
მესტიის მკვიდრი ვიკა ფილფანი “მთავარ არხთან” საუბარში ამბობს, რომ ორი ახალგაზრდა მამაკაცი ქვემო სვანეთისკენ გადაადგილდებოდნენ და გზა აებნათ. მათი ახლობლების თქმით, ორშაბათს, 22 ივლისს დილით მათ აცნობეს, რომ გზა ვერ მოიძებნა. “გადადიოდნენ ზემო სვანეთიდან ქვემო სვანეთისკენ, ლასდილის მარშრუტით. კვირას უკვე ადგილზე უნდა ყოფილიყვნენ. ორშაბათს, დილით გამოვიდნენ კონტაქტზე, რომ გზა აებნათ,” – აღნიშნავს ფილფანი.
ფილფანი ასევე ყურადღებას ამახვილებს იმაზე, რომ ამინდი შედარებით კარგი იყო: “ცა მოწმენდილია, ღრუბელი ალაგ-ალაგ არის, არაფერი ჭექა-ქუხილი და დამაქცეველი არ ხდება. თუ ვერტმფრენი არ არის ადაპტირებული ასეთ ამინდზე, მაშინ, არასწორად ჰყავთ.”
საგანგებო სიტუაციების მართვის სამსახურის ცნობით, დაკარგულების შესახებ ინფორმაცია საზოგადოებრივი უსაფრთხოების მართვის ცენტრ 112-ში გუშინ, 24 ივლისს შევიდა. ოპერაციის მიმდინარეობა გრძელდება და მაქსიმალური ძალისხმევა ხორციელდება, რათა დაკარგული მოქალაქეები რაც შეიძლება მალე იპოვნონ.
მასალის გამოყენების პირობები
