“ოჯახმა მითხრა, ახლა გასაგებია, რატომ ხარ საქართველოში ბედნიერიო”

სექტემბრის სანაკრებო მატჩების წინ ვილი სანიოლმა ჟურნალისტების შეკითხვებს უპასუხა.

ვილი სანიოლის ოჯახი საქართველოშია: “როდესაც ჩამოვიდნენ აქ, რამდენიმე დღეში მეუბნებიან: ახლა ვხვდებით, რატომ გიხარია საქართველოში ყოფნა. ბედნიერი არა მარტის შემდეგ, მანამდეც ვიყავი. დიდებული ხალხი ცხოვრობს აქ. მანამ, სანამ ჩემი ბოსები ჩემი მუშაობით კმაყოფილები იქნებიან, გავაგრძელებთ მუშაობას ერთად”.

დებიუტანტებზე: “ლუკა გადრანი ბოლო წლებია ყაზახეთის ჩემპიონატში სტაბილურად თამაშობს. ევროპის ჩემპიონატზე ვნახეთ, რა მნიშვნელობისაა ფეხბურთელს სათამაშო პრაქტიკა ჰქონდეს. მან დაიმსახურა აქ ყოფნა, ისევე, როგორც ნონიკაშვილმა, რომელსაც 21-წლამდე ნაკრებიდან ვაკვირდებოდით”.

ირაკლი აზაროვზე: “მიხარია, რომ ახლა ჩვენთან ერთადაა და დაგვიბრუნდა. აუცილებლად მიიღებს შანსს, მისი ხარისხი დაგვიმტკიცოს.”

მამარდაშვილის ლივერპულში ტრანსფერზე: “მსოფლიოს 10 საუკეთესო გუნდში გადავიდა და მის გამო ბედნიერი ვარ. დამსახურებულია ყველაფერი, რასაც იღებს ფეხბურთისგან, ბოლო 3 წელში ნაჩვენები ხარისხის გამო. ლივერპულის გარდა, მისი დამატება ევროპის სხვა დიდ გუნდებსაც სურდათ.”

ჯიმი ტაბიძეზე: “ვიცი, რომ ახლა რუსეთში კარიერის გაგრძელება ოპტიმალური ვარიანტი არაა, მასთან ამ საკითხზე ჯერ არ მისაუბრია, თუმცა რომ ჩამოვა, აუცილებლად გავესაუბრები მის მოტივაციაზე. კვერკველია უკლუბოდაა, ხოჭოლავამ კარიერა დაასრულა, საზონოვს სათამაშო პრაქტიკა არ აქვს, კალანდაძე ბოლო თვეებში არასასურველ ფორმაშია. მე შედეგისთვის საუკეთესო ფეხბურთელები მჭირდება შემადგენლობაში და ვთვლი, მისი სათამაშო ფორმიდან გამომდინარე, ჯიმი ახლა უნდა იყოს შემადგენლობაში. ახლა მცველებს შორის არ მაქვს დიდი არჩევანი”.

გურამ კაშიაზე: “ბედნიერი ვარ, რომ ჩემპიონთა ლიგაზე ითამაშებს. არც კი მიფიქრია, რომ ევროპის ჩემპიონატის შემდეგ ის ნაკრებში კარიერას დაასრულებდა. კარგი ღვინოსავითაა, ასაკის მატება უხდება. ბედნიერი ვარ, რომ ის ჩვენი კაპიტანია, დიდი იმედი მაქვს დიდხანს იქნება ჩვენთან ერთად და გააგრძელებს გუნდის კაპიტნობას”.

საქართველოს ნაკრები 7 სექტემბერს მიხეილ მესხის სახელობის სტადიონზე ჩეხეთს დაუპირისპირდება, 10 სექტემბერს კი ტირანაში, ალბანეთს.

Geo Team