გორში მომხდარი ინციდენტის საქმეზე პაპუნა ლოცულაშვილი, რომელიც გავრცელებულ კადრებში სამართალდამცავების მხრიდან ძალადობის მსხვერპლია, სამედიცინო გამოკვლევებისთვის თბილისში, კლინიკა VivaMedi-ში გადაიყვანეს.
მისი ადვოკატის, ლაშა ტყეშელაძე-ის განცხადებით, ლოცულაშვილს სხეულისა და სახის არეში მრავლობითი დაზიანებები აღენიშნება. უფლებადამცველის თქმით, არსებობს ეჭვი ტვინის შერყევასა და სახის ძვლების შესაძლო დაზიანებაზე, რის გამოც აუცილებელი გახდა გადაუდებელი სამედიცინო კვლევები.
ადვოკატის ინფორმაციით, ექსპერტიზის ჩატარებისას დაზიანებულ ადგილებზე შეხებისას პაციენტს ძლიერი ტკივილი აღენიშნებოდა, რის შემდეგაც ექსპერტებმა კლინიკაში გადაყვანის რეკომენდაცია გასცეს. მისი თქმით, დაზიანებები ფიქსირდება ხელებზე, ფეხებზე, მუცლის არეში და სხეულის სხვა ნაწილებზეც.
უფლებადამცველი ასევე აცხადებს, რომ მისი დაცვის ქვეშ მყოფი ამ ეტაპზე ბრალდებულის სტატუსით არის დაკითხული. საქმე საქართველოს სისხლის სამართლის კოდექსის 353-ე მუხლით მიმდინარეობს, რაც პოლიციის თანამშრომლისთვის წინააღმდეგობის გაწევას გულისხმობს.
დაცვის მხარე მოითხოვს:
- შეწყდეს ლოცულაშვილის წინააღმდეგ მიმდინარე სისხლის სამართლის საქმე;
- პასუხისგებაში მიეცნენ ძალადობაში მონაწილე პირები;
- სრულად იქნას შესწავლილი ფიზიკური დაზიანებების გარემოებები.
ადვოკატის განმარტებით, ლოცულაშვილის ჯანმრთელობის მდგომარეობის გამო ამ ეტაპზე მას სრულყოფილი ჩვენების მიცემა ვერ შეძლო და პრიორიტეტი გადაუდებელ სამედიცინო დახმარებას ენიჭება.
მისივე ინფორმაციით, საგამოძიებო ორგანომ საბოლოოდ აღარ ჩათვალა საჭირო მისი დაკავების გაგრძელება და სწორედ ამ საფუძვლით მოხდა გათავისუფლება.
შეგახსენებთ, რომ გორში, ე.წ. კომბინატის დასახლებაში, ორი მოქალაქის მიმართ სამართალდამცავების მხრიდან ფიზიკური ძალადობის ამსახველი კადრები მედია პლატფორმამ ქართლის ამბები გაავრცელა.
ფაქტზე საქართველოს პროკურატურა-მ პოლიციელების მხრიდან უფლებამოსილების შესაძლო ძალადობრივი გადამეტების მუხლით გამოძიება უკვე დაიწყო.
