ჰორმუზის სრუტე — სტრატეგიულად ერთ-ერთი ყველაზე მნიშვნელოვანი საზღვაო გასასვლელი მსოფლიოში — კვლავ საერთაშორისო დიპლომატიის ცენტრში აღმოჩნდა. ირანმა და ომანმა ამ წყლებში სატრანზიტო მოძრაობის ახალი წესების შესახებ შეთანხმებას მიაღწიეს, რაც მომავალში სერიოზულ გავლენას მოახდენს რეგიონის საზღვაო ლოგისტიკაზე.
ირანული საინფორმაციო სააგენტოს ცნობით, გარიგება ამ ორ სახელმწიფოს შორის გაფორმდა და მისი ოფიციალური წარდგენა უახლოეს მომავალში იგეგმება. დეტალები — მათ შორის კონკრეტული მარშრუტები და ტრანზიტის პირობები — საჯარო გახდება სპეციალური შეხვედრის ფარგლებში, რომელიც ომანში გაიმართება და სპარსეთის ყურის მოსაზღვრე ქვეყნების საგარეო საქმეთა მინისტრები დაესწრებიან.
შეთანხმების არსი იმაში მდგომარეობს, რომ ჰორმუზის სრუტეში ახალი შესასვლელი და გასასვლელი მარშრუტები შეიქმნება. კონკრეტულად, სპარსეთის ყურის მიმართულებით მიმავალი გზა სრულად ირანის ტერიტორიულ წყლებში გაივლის, ხოლო საპირისპირო მიმართულებაც ნაწილობრივ ირანის კონტროლქვეშ მყოფ წყლებში განხორციელდება. ამ მარშრუტებზე გადაადგილება ირანის მიერ დადგენილი წესებით მოხდება.
განსაკუთრებით საყურადღებოა ის ფაქტი, რომ ახალი სისტემის ამოქმედება გულისხმობს სამხრეთის, ე.წ. ამერიკის მიერ სასურველი მარშრუტის დახურვას. სწორედ ეს საკითხი — ვინ გააკონტროლებს ჰორმუზის სრუტის სატრანზიტო გზებს — ბოლო პერიოდში ვაშინგტონსა და თეირანს შორის დაძაბულობის ერთ-ერთ მთავარ კერად იქცა.
ამ შეთანხმებით ირანი პრაქტიკულად აძლიერებს თავის პოზიციებს ჰორმუზის სრუტეზე, სადაც ყოველდღიურად მსოფლიო ნავთობის მნიშვნელოვანი ნაწილი გადის. ექსპერტები მიიჩნევენ, რომ ეს ნაბიჯი გეოპოლიტიკურ ბალანსზე ასახვას ვერ ასცდება.
Sheni Ambebi News
წყარო: primetime.ge
QR კოდი
სტატიის ციტირება
შენი ამბები. (2026). ირანი და ომანი ჰორმუზის სრუტეში ახალ საზღვაო მარშრუტებზე შეთანხმდნენ. 13 სექტემბერი, 2026. https://sheniekimi.ge/ambebi/ირანი-და-ომანი-ჰორმუზის-ს/
