თორნიკე რიჟვაძის ჯანმრთელობის მდგომარეობაში დადებითი დინამიკა შენარჩუნებულია. პირველი საუნივერსიტეტო კლინიკის ექიმების ინფორმაციით, პაციენტი კონტაქტური, ადეკვატურია და არსებული საფრთხეები, ამ ეტაპზე, განეიტრალებულია.
“ზოგადი მდგომარეობა სტაბილურად მძიმე რჩება, დინამიკა დადებითია. ჰემოდინამიკური პარამეტრები შენახულია, კორეგირებულია, არ საჭიროებს მედიკამენტოზურ მხარდაჭერას. ნევროლოგიური სტატუსის მხრივ, კონტაქტურია, ასრულებს ყველას დავალებას. სუნთქვის პარამეტრები მკვეთრად არის გაუმჯობესებული, დადებითი დინამიკაა. თუ ასე გაგრძელდა, პაციენტი ალბათ რამდენიმე დღეში მოიხსნება მართვითი სუნთქვიდან”, – აცხადებს თსსუ-ს პირველი საუნივერსიტეტო კლინიკის გენერალური დირექტორი ლევან რატიანი.
გულ-მკერდში მიყენებული ცეცხლნასროლი ჭრილობით, აჭარის მთავრობის ყოფილი ხელმძღვანელი კლინიკაში უკვე მესამე დღეა იმყოფება.
პარალელურად, თორნიკე რიჟვაძის, სავარაუდოდ, თვითმკვლელობის მცდელობის საქმეზე გამოძიება გრძელდება. სხვა საგნებთან ერთად, ექსპერტიზა უტარდება იმ წერილსაც, რომელიც, გავრცელებული ინფორმაციით, რიჟვაძემ თვითმკვლელობის მცდელობამდე დაწერა.
რაც შეეხება ალექსი ახვლედიანს, რომლის სახლშიც და რომლის იარაღიდანაც მოხდა გასროლა – სასამართლომ ის, 30 000-ლარიანი გირაოს საფუძველზე, გუშინ, დღის ბოლოს, დარბაზიდან გაათავისუფლა. მას ცეცხლსასროლი იარაღის დაუდევრად შენახვას ედავებიან, რამაც მძიმე შედეგები გამოიწვია.
