დონალდ ტრამპის ადმინისტრაცია, ირანთან მოლაპარაკებების განახლების ძალისხმევის ფარგლებში, განიხილავს თეირანისთვის 30 მილიარდი დოლარის უზრუნველყოფის შესაძლებლობას მშვიდობიანი ბირთვული პროგრამის განვითარებისთვის. ინფორმაციას ამის შესახებ ტელეკომპანია CNN-ი ავრცელებს.
ამის სანაცვლოდ, თეირანმა უნდა თქვას უარი ურანის გამდიდრებაზე, ეს პუნქტი „განხილვას არ ექვემდებარება“.
წყაროების ცნობით, აშშ ახლო აღმოსავლეთის ქვეყნებთან ინვესტიციების შესაძლებლობას ბოლო ორი კვირის განმავლობაში განიხილავდა, ირანსა და ისრაელს შორის მორიგი დაძაბულობის ფონზე.
ვარაუდობენ, რომ თანხა არა შეერთებული შტატებიდან, არამედ არაბული ქვეყნებიდან შემოვა.
„აშშ მზად არის უხელმძღვანელოს ამ მოლაპარაკებებს. ბირთვული პროგრამის განსახორციელებლად ვიღაცას მოუწევს გადახდა, მაგრამ ჩვენ ასეთ ვალდებულებებს არ ავიღებთ“, – განაცხადა ადმინისტრაციის წარმომადგენელმა.
ამერიკელმა ოფიციალურმა პირებმა განაცხადეს, რომ კიდევ რამდენიმე წინადადება იყო წამოყენებული. კერძოდ, ირანისთვის გარკვეული სანქციების მოხსნა და თეირანისთვის 6 მილიარდი დოლარის გაყინული აქტივების გახსნა, რომლებიც უცხოურ ბანკებში ინახება.
კიდევ ერთი იდეაა, რომ სპარსეთის ყურეში აშშ-ის მოკავშირეებმა დააფინანსონ ინფრასტრუქტურის აღდგენა ამერიკული დარტყმების შედეგად დაზიანებული ფორდოს ბირთვული ობიექტისთვის, რომელსაც ასევე არ ექნება ურანის გამდიდრების შესაძლებლობა.
