“გლდანისა და ვარკეთილის მხარეს ახალი მეტროსადგურები დაემატება“, – ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.
კერძოდ, მისი თქმით, გაზრდილი მგზავრთნაკადის გამო, მერიამ გადაწყვიტა რომ მეტროსადგური პირველ ხაზზე, ორივე მიმართულებით, როგორც ახმეტელის მეტროსადგურის, ისე ვარკეთილის მეტროსადგურის მიმართულებით დაემატება თითო სადგური.
„რამდენიმე მთავრობის სხდომის წინ ჩვენ ვისაუბრეთ, რომ ახმეტელისა და მარჯანიშვილის მეტროსადგურზე მეორე ამოსასვლელ-ჩასასვლელის პროექტს ვაკეთებთ. თუმცა, მხოლოდ ეს არ არის გამოსავალი.
მინდა მოგაწოდოთ ინფორმაცია მეტროს პირველ ხაზთან დაკავშირებით. როგორც ახმეტელის მეტროსადგურზე, ისე ვარკეთილის მეტროსადგურზე განხორციელდება ახალი პროექტი, რაც მოგვცემს იმის შესაძლებლობას, რომ თითო სადგურით ორივე მიმართულებით დავაგრძელოთ მეტრო.
მოგაწვდით დეტალურ ინფორმაციას: ვარკეთილის მიმართულებით პერსპექტიული დაგრძელების ჯამური სიგრძე იქნება 1.2 კმ. ახალი მეტროსადგური დილის პიკის საათში 4 500 მგზავრს მიიზიდავს. მაგალითისთვის, ჰუალინგის ვარკეთილის მიმართულებით მინიმალური დღიური მგზავრთნაკადია 66 ათასი ადამიანი, რომელთა ნაწილი შეძლებს გადანაწილდეს და გამოიყენოს ახალი მეტროსადგური.
რაც შეეხება გლდანის მხარეს პერსპექტიული დაგრძელების სიგრძე არის 1.1 კმ. ახალი სადგური დილის პიკის საათში 5 500 მგზავრს მიიზიდავს. ჩატარებული კვლევების მონაცემებით, ახმეტელის თეატრის მიმდებარედ გადამსხდომ მგზავრთა რაოდენობა დილის საათებში შემცირდება 4 460 მგზავრით, ხოლო ზოგადად გლდანის რაიონიდან მგზავრთნაკადი 11 ათასით მოიმატებს.
აღსანიშნავია, რომ ორივე საპროექტო სადგურის შემთხვევაში საგრძნობლად შემცირდება იმ მგზავრთა რაოდენობა, რომელსაც სადგურის მოედნამდე მისასვლელად სჭირდებოდა ორჯერ გადაჯდომა. ამასთან, შემცირდება მათი მგზავრობის საერთო დრო თითქმის 20 წუთით. პროექტი გააუმჯობესებს საფეხმავლო და მისაწვდომობას. მეტროსადგურების უახლესი უბნები მიზიდულობის წერტილებად იქცევა და გაიზრდება ეკონომიკური აქტივობა,“ – აღნიშნა კალაძემ.
-
ლოკაციები, სადაც გლდანსა და ვარკეთილში ახალი მეტროსადგურების აშენება იგეგმება
ვარკეთილში მეტროსადგურის აშენება საქართველოს ერთიანობისთვის მებრძოლთა და დიმიტრი ალექსიძის ქუჩების კვეთაზე იგეგმება.
რაც შეეხება გლდანს, მეტროს ახალი ხაზი მეტროსადგურ ახმეტელიდან კენტ და ლუწ მიკრორაიონებს შორის, კერძოდ, ვეკუა-ხიზანიშვილის ქუჩების გაყოლებაზე გაივლის.
