ბიძინა მახარაძე ტელეეკრანებზე უკვე არაერთი წელია ჩანს. მიუხედავად იმისა, რომ მის მიერ განსახიერებული პერსონაჟები თუ შესრულებული როლები ხშირად მაყურებლისთვის მხიარულებისა და სიცილის მომგვრელია, თავად მსახიობის ცხოვრება არც ისე ლაღი და უდარდელი ყოფილა. მან ადრეულ ასაკში რუსეთში ცოლად რუსი ქალი მოიყვანა, რომელთანაც ორი შვილი ჰყავს. როგორც მსახიობმა გადაცემა “სიცრუის დეტექტორში” ისაუბრა, მიუხედავად არაერთი მცდელობისა, შვილებთან ურთიერთობა ვერ დაალაგა და კონტაქტი არც დღეს აქვთ. რუსეთიდან საქართველოში დაბრუნებულმა ბიძინა მახარაძემ 55 წლის ასაკში მეორე ცოლი მოიყვანა, თუმცა შვილი ამ ქორწინებაში არ ჰყავს. პირველ მეუღლესთან ურთიერთობას კი ის შეცდომად თვლის:
“ამ თემაზე დისერტაცია შემიძლია, რომ დავიცვა. ოსტროვსკის პიესები რომ მენახა, ამ რუს ქალს მე ცოლად არ მოვიყვანდი. ორი კოსმოსი, ორი დიდი კულტურა შეეჯახა ერთმანეთს. მყავდა რუსი ცოლი. საერთოდ, საქართველოში რუსი ცოლის მოყვანა სხვა არის, მე რუსეთში მოვიყვანე, სხვა მოედანზე ვიყავი. ეს შეცდომა დედაჩემმა დამაშვებინა, მითხრა, შენ მსახიობი ხარ, ცოლის მომყვანი აღარ ხარო, თან საერთო შვილი უკვე გვყავდა. მომკიდა დედაჩემმა ქეჩოში ხელი და ხელი მომაწერინა. ერთმანეთი არ გვიყვარდა, არც მე მიყვარდა და არც მას, იმას გათვლა ჰქონდა ქართველზე, რომ ქართველია, ფული ექნებაო. ჩემი საშუალებით ბინა გაიკეთა მოსკოვში.
ცოლს არ უღალატია, არა, უბრალოდ, რუსი იყო. სხვის მოედანზე არ ღირს რუსის მოყვანა, იქ რომ მოიყვან და აქ ჩამოიყვან, მაშინ სხვა თემაა. იქ დაქალები ძალიან დიდ გავლენას ახდენდნენ მასზე. ცოლი არ იყო ჯერ, ვსაყვარლობდით, მე მაგ დროს ჯარში ვიყავი. ერთ დღეს მომივიდა წერილი, ჩვენ გვეყოლება ბიჭი. მაიორს ვუთხარი, უნდა ჩავიდე მოსკოვში და გადავათქმევინო-მეთქი. არ მინდოდა შვილი საყვარლისგან, ცოლად რომ მდომებოდა, ხომ მოვიყვანდი-მეთქი. 41 წლისაა ახლა ჩემი ბიჭი. ცოლს ხანდახან ვურეკავ და შვილი არ მელაპარაკება. მე რაც კი შემეძლო, გადავყევი შვილებს, მაგრამ მათთან ურთიერთობა არ მაქვს. ამ ქალთან მეორე შვილიც შემეძინა. ამ დროს უკვე გაიგო, რომ ქართველი ქალი მომყავდა ცოლად და მაინც გააჩინა. მე კი ვურეკავ შვილებს, მაგრამ ისინი არ მელაპარაკებიან, რადგან დედამისი მივატოვე. არკადი 41 წლის არის, ჩემს გვარს ატარებს, მაგრამ მისი შვილი არ არის მახარაძე. მე ვუთხარი, შენ არანაირი მახარაძე არ ხარ-მეთქი, დედამისს ჰგავს ძალიან. შვილები მიყვარდა, მაგრამ შეუძლებელი იყო ჩემი იქ გაჩერება. მე კი მინდა შვილებთან ურთიერთობის აღდგენა, მაგრამ ის ქალი ჭკვიანია, დემაგოგია, ტვინი გამოურეცხა ბავშვებს და ბლოკავს ჩვენს ურთიერთობას. ჩემგან არანაირი ცუდი მოქცევა არ ყოფილა” – ამბობს ბიძინა მახარაძე.
