დღის ამბები პოზიტივზე
დღის ამბები -ქსელის გეგმური სარეაბილიტაციო სამუშაოების გამო, 11 ოქტომბერს ელექტროენერგიის მიწოდება აბონენტების ნაწილს შეეზღუდება. ამის შესახებ ინფორმაციას „ენერგო-პრო ჯორჯია“ ავრცელებს.
კერძოდ, 11 ოქტომბერს, 10:00-იდან 18:00 საათამდე, ელექტროენერგიის მიწოდება შეეზღუდება აბონენტებს დუშეთის რაიონის სოფლებში.
სამუშაოების დასრულებისთანავე, ელექტროენერგიის მიწოდება ჩვეული რეჟიმით აღდგება.
****
უეფა-ს ერთა ლიგის ჯგუფური ეტაპის გასვლით შეხვედრაში საქართველოს ეროვნული საფეხბურთო ნაკრები უკრაინის ნაკრებს დაუპირისპირდება.
მატჩი დღეს, 11 ოქტომბერს, ქალაქ პოზნანში, თბილისის დროით 22:45 საათზე დაიწყება.
ამასთან, ქართველი გულშემატკივრებისთვის რესპუბლიკის მოედანზე, თბილისის მერიისა და საქართველოს ფეხბურთის ფედერაციის ორგანიზებით, დიდი ეკრანი დამონტაჟდება, სადაც უკრაინა-საქართველოს საფეხბურთო მატჩის საჯარო ჩვენება გაიმართება.
****
საქართველოს ტურიზმის ეროვნული ადმინისტრაცია იტალიაში, ქალაქ რიმინიში, საერთაშორისო ტურისტულ გამოფენაში მონაწილეობს.
საქართველოს ტურიზმის ეროვნული ადმინისტრაციის ინფორმაციით, საქართველოს ტურიზმის ეროვნულ ადმინისტრაციასთან ერთად წარმოდგენილია 10-მდე კერძო კომპანია და სახელმწიფო ორგანიზაცია.
მათივე ცნობით, გამოფენაში საქართველოს მონაწილეობის მნიშვნელობაზე საუბრობს ტურიზმის ეროვნული ადმინისტრაციის ხელმძღვანელი, მაია ომიაძე.
ევროპაში ერთ-ერთ მასშტაბურ საერთაშორისო გამოფენას 70 ათასამდე ვიზიტორი ეწვია.
****
ცენტრალურმა საარჩევნო კომისიამ საზღვარგარეთ მყოფი ამომრჩევლების შესახებ მონაცემები დაამუშავა. ამის შესახებ ინფორმაციას ცესკო ავრცელებს.
როგორც გავრცელებულ ინფორმაციაშია ნათქვამი, საგარეო საქმეთა სამინისტროდან და სხვა შესაბამისი უწყებებიდან მიღებული განახლებული მონაცემების მიხედვით, ამ დროისთვის საზღვარგარეთ ხმის მიცემის უფლების მქონე ამომრჩეველთა რაოდენობა 95 834-ს შეადგენს.
****
14 ოქტომბრიდან ნატო ყოველწლიურ ბირთვულ წვრთნებს გამართავს, – ამის შესახებ ნატო-ს გენერალურმა მდივანმა, მარკ რუტემ ლონდონში, უკრაინის პრეზიდენტ ვოლოდიმირ ზელენსკისთან და დიდი ბრიტანეთის პრემიერ-მინისტრთან შეხვედრის შემდეგ განაცხადა.
„არასტაბილურ მსოფლიოში სასიცოცხლოდ მნიშვნელოვანია, რომ ჩვენი თავდაცვა გამოვცადოთ და გავამყაროთ, რათა ჩვენმა მოწინააღმდეგეებმა იცოდნენ, რომ ნატო მზად არის და შეუძლია ნებისმიერ საფრთხეს უპასუხოს“, – განაცხადა მარკ რუტემ.
ნატო-ს გენერალურმა მდივანმა აღნიშნა, რომ წვრთნების დროს განსაკუთრებული აქცენტი დიდ ბრიტანეთზე, ჩრდილოეთის ზღვაზე, ბელგიასა და ნიდერლანდებზე გაკეთდება.
****
ჯანდაცვის მსოფლიო ორგანიზაციის საერთაშორისო ექსპერტებმა აფხაზეთის ჯანმრთელობისა და სოციალური დაცვის მინისტრთან, ლაშა ქარდავასთან სამუშაო შეხვედრა გამართეს.
ამის შესახებ ინფორმაციას აფხაზეთის ავტონომიური რესპუბლიკის მთავრობა ავრცელებს.
მათივე ცნობით, შეხვედრაზე, საერთაშორისო ექსპერტებმა, საქართველოსთვის მალარიისგან თავისუფალი ქვეყნის სერტიფიცირების სტატუსის მინიჭების საკითხებთან დაკავშირებით ისაუბრეს.
****
სამტრედიის ქუჩაზე, მიმდინარე წლის მარტში, აფეთქების შედეგად დაზიანებული კორპუსის გაძლიერება-გამაგრების სამუშაოები 4 თვეში დასრულდება. აღნიშნულის შესახებ დიდუბის რაიონის გამგეობაში განაცხადეს.
როგორც გამგეობაში განმარტავენ, ექსპერტიზის დასკვნის მიხედვით, ორ სადარბაზოში დროებითი გაძლიერებითი სამუშაოების ჩატარების აუცილებლობა იყო. აფეთქების შედეგად დაზიანებული კორპუსის გაძლიერება-გამაგრების სამუშაოები თებერვალში დასრულდება.
****
უკრაინის პრეზიდენტმა, ვოლოდიმირ ზელენსკიმ იტალიის პრემიერ-მინისტრს, ჯორჯია მელონის „გამარჯვების გეგმა“ წარუდგინა, – ამის შესახებ ზელენსკი “ტელეგრამ” არხზე წერს.
„ძალიან ნაყოფიერად განვიხილეთ გეგმის ყველა ასპექტი. მთავარია, გავაძლიეროთ უკრაინის პოზიციები და ჩვენი ურთიერთობები მის უახლოეს პარტნიორებთან ისე, რომ შევქმნათ აუცილებელი პირობები, აუცილებელი სამართლიანი ატმოსფერო სამართლიანი დიპლომატიისთვის”, – აცხადებს ზელენსკი.
მან იტალიის პრემიერს უკრაინისთვის აღმოჩენილი დახმარებისთვის მადლობა გადაუხადა.
****
სამეგრელოში, ტობავარჩხილის ტბასთან ჩეხ მოლაშქრეს ეძებენ. როგორც შინაგან საქმეთა სამინისტროში განაცხადეს, საქმეზე გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.
ამასთან, უწყებაში განმარტავენ, რომ სამძებრო სამუშაოები აქტიურ რეჟიმში მიმდინარეობს.
****
გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, უკანონო ტყითსარგებლობასთან ბრძოლის ფარგლებში, შიდა ქართლში უკანონო სახერხი საამქრო გამოავლინეს.
ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.
მათი ცნობით, ლენტური ტიპის არარეგისტრირებული სახერხი დანადგარი, ხაშურის მუნიციპალიტეტის სოფელ დამჩხეულაში, დალუქულია.
****
ევროკომისიამ მოლდოვასთვის 1.8 მილიარდი ევროს ოდენობის დახმარების პაკეტი მიიღო. დახმარების პაკეტი ქვეყანას ევროკავშირისკენ გზაზე დაეხმარება. ამის შესახებ ევროკომისიის პრეზიდენტმა, ურსულა ფონ დერ ლაიენმა მოლდოვაში ვიზიტის დროს განაცხადა.
განცხადების თანახმად, ევროკომისიამ მოლდოვისთვის 1.8 მილიარდი ევროს ოდენობის “ზრდის გეგმა” გასცა, რაც ევროკავშირისგან ყველაზე დიდი ფინანსური დახმარების პაკეტია ქვეყნის დამოუკიდებლობის ისტორიაში.
****
ცესკოს გადაწყვეტილებით, საარჩევნო ბიულეტენები და შემაჯამებელი ოქმები სამ პოლიგრაფიულ დაწესებულებაში დაიბეჭდება.
ცესკოს სხდომაზე განისაზღვრა ის ორგანიზაციები და კომისიის წევრები, რომლებიც საარჩევნო ბიულეტენებისა და შემაჯამებელი ოქმების ბეჭდვის პროცესს დააკვირდებიან.
დამკვირვებელთა ჯგუფი თითოეულ პოლიგრაფიულ დაწესებულებაში 2-2ი კომისიის წევრით დაკომპლექტდა.
****
პერსონალურ მონაცემთა დაცვის სამსახურის ორგანიზებით, შეზღუდული შესაძლებლობების მქონე პირთა უფლებების საკითხებზე მომუშავე ორგანიზაციების წარმომადგენლებთან შეხვედრა გაიმართა.
პერსონალურ მონაცემთა დაცვის სამსახურის ინფორმაციით, შეხვედრა მისასალმებელი სიტყვით სამსახურის უფროსმა გახსნა.
ღონისძიებაზე შეკრებილი ორგანიზაციების წარმომადგენლებს მისასალმებელი სიტყვით, ასევე, მიმართეს: პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, დევნილთა, შრომის, ჯანმრთელობისა და სოციალური დაცვის მინისტრმა და სახალხო დამცველმა
****
დედაქალაქის მერმა კახა კალაძემ, მოადგილე ანდრია ბასილაიასთან ერთად, მთაწმინდის რაიონში, ლადო ასათიანის N50-ში მრავალფუნქციური სპორტული ცენტრი გახსნა.
ამის შესახებ ინფორმაციას თბილისის მერია ავრცელებს.
როგორც კახა კალაძემ განაცხადა, ჯანსაღი ცხოვრების წესის პოპულარიზაციისა და ხელშეწყობისთვის, მსგავსი პროექტების განხორციელება მნიშვნელოვანია.
****
დედაქალაქის მერის, კახა კალაძის განცხადებით, მეტროსადგური “ავლაბარი” რამდენიმე დღეში გაიხსნება, მეტროსადგურ „ვარკეთილთან“ დაკავშირებით კი ვადებთან დაკავშირებით ჩამორჩენაა.
აღნიშნულის შესახებ მან ჟურნალისტებთან საუბრისას განაცხადა.
„ვარკეთილის“ მეტროსადგურს, გარკვეული ჩამორჩენები აქვს ვადებთან დაკავშირებით, თუმცა ესეც ძალიან მალე იქნება დამთავრებული, უფრო დეტალურად საზოგადოებას მივაწვდით ინფორმაციას”, – განაცხადა კახა კალაძემ.
****
დიდი ევროპული საბჭოს პრეზიდენტის, შარლ მიშელის განცხადებით, გაერო-ს სამშვიდობო ოპერაციებზე თავდასხმა მიუღებელია.
„გაერო-ს სამშვიდობო მისიაზე თავდასხმა არის უპასუხისმგებლო, მიუღებელი ქმედება და ამიტომ მოვუწოდებთ ისრაელს და ყველა მხარეს, სრულად სცენ პატივი საერთაშორისო ჰუმანიტარულ კანონს“, – განაცხადა შარლ მიშელმა.
მანამდე, გაერო-ს სამშვიდობოებმა განაცხადეს, რომ ისრაელის ძალებმა ცეცხლი გაუხსნეს მათ შტაბ-ბინას სამხრეთ ლიბანში, რის შედეგადაც ორი ინდონეზიელი დაიჭრა.
****
წელს, იანვარ-აგვისტოში, წინა წლის ანალოგიურ პერიოდთან შედარებით, ნაჭუჭგაუცლელი, ახალი ან ხმელი ფისტას იმპორტი 183%-ით გაიზარდა, რითაც ისტორიული მაქსიმუმი დაფიქსირდა.
სტატისტიკის ეროვნული სამსახურის მონაცემებით, 2024 წლის 8 თვეში ქვეყანაში 3 312 ტონა პროდუქტი შემოვიდა, რაც თითქმის, 3-ჯერ მეტია წინა წლის იანვარ-აგვისტოს მაჩვენებელზე.
****
ბათუმის შემოვლითი 14-კილომეტრიანი მაგისტრალური გზის მშენებლობა დასრულდა და გზა ავტოტრანსპორტისთვის გაიხსნა.
ამის შესახებ ინფორმაციას საქართველოს რეგიონული განვითარებისა და
ინფრასტრუქტურის სამინისტრო ავრცელებს.
მათი ცნობით, ბათუმის შემოვლითი გზის მშენებლობის პროექტის ფარგლებში, 14 კმ-იანი, 2 ზოლიანი ასფალტ-ბეტონის გზა აშენდა, რომელიც 20 ხიდსა და 5 გვირაბს მოიცავს.
****
ეკონომიკის ზრდის მაჩვენებელი წლის ბოლოს მინიმუმ 8.5%-ზე იქნება – ამის შესახებ ეკონომისტმა გიორგი ცუცქირიძემ განაცხადა.
მისი თქმით, აღნიშნული მოლოდინი ეყრდნობა იმ მაკროეკონომიკურ ფაქტორებსა და პარამეტრებს, რომელიც ქვეყანაშია.
ცნობისათვის, საქსტატის წინასწარი შეფასებით, 2024 წლის აგვისტოში, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდამ 12% შეადგინა, ხოლო 2024 წლის პირველი რვა თვის საშუალო მაჩვენებელი 10%-ით განისაზღვრა.
****
„რაოდენობრივადაც და ხარისხობრივადაც თხილის იგივე მოსავალი გვაქვს, რაც წინა წელს, გაუმჯობესება პრაქტიკულად, არ შეინიშნება“, – ამის შესახებ საქართველოს თხილის გადამამუშავებელთა და ექსპორტიორთა ასოციაციის აღმასრულებელმა დირექტორმა ლევან ქარდავამ განაცხადა.
მისი თქმით, მთავარი გამოწვევა თხილის ხარისხია, რაც ართულებს კომპანიებს მუშაობას. გარდა ამისა, როგორც ლევან ქარდავა აღნიშნავს, თხილის ქარხნებისთვის პრობლემაა საბრუნავი საშუალებების ხელმისაწვდომობა, თუმცა, მთავარი საკითხი მაინც პროდუქტის დაბალი ხარისხია.
****
2023 წელი ყველაზე მშრალი წელი იყო მსოფლიოს მდინარეებისთვის სამი ათწლეულის განმავლობაში.
ამის შესახებ მსოფლიო მეტეოროლოგიური ორგანიზაციის მიერ გამოქვეყნებულ ანგარიშშია ნათქვამი.
რადგან გასული წელი იყო რეკორდულად ყველაზე ცხელი წელი, გაზრდილმა ტემპერატურამ და ფართოდ გავრცელებულმა მშრალმა პირობებმა ხელი შეუწყო გახანგრძლივებულ გვალვას. კლიმატის ცვლილება ასევე ხელს უწყობს ექსტრემალურ წყალდიდობებს მთელს მსოფლიოში.
დღის ამბები ჰოროსკოპი და გემოვნებიანი მუსიკა მოისმინეთ რადიო „პოზიტივზე“ 104.3 Fm
გაიგეთ მეტი ჩვენს ტელეგრამ არხზე შემოგვიერთდით ტელეგრამზე: https://t.me/SheniEkimi
მასალის გამოყენების პირობები
