საქართველოს საზოგადოებრივი ჯანდაცვის ინსტიტუტის ხელმძღვანელის, ჯანდაცვის ექსპერტის, პროფესორ გიორგი ფხაკაძის მოსაზრებით, მრავალი მორწმუნისთვის პატრიარქი უკვე წმინდანია — და დროა, ეს ოფიციალურადაც იქნას აღიარებული.
„მრავალი მორწმუნისთვის პატრიარქი უკვე წმინდანია — და დროა, ეს ოფიციალურადაც იქნას აღიარებული.“
პატრიარქი ჩემთვის მხოლოდ ეკლესიის მეთაური არ არის — ის არის სულიერი მამა, რომლის არსებობამ ბევრ ჩვენგანს იმედი და სიმშვიდე მისცა. მისი სიტყვები არაერთხელ ქცეულა ნუგეშად ყველაზე რთულ დროს, ხოლო მისი თავმდაბლობა და სიყვარული — მაგალითად, როგორ უნდა იცხოვროს ადამიანმა ღირსეულად.
მე პირადად მქონდა ის დიდი კურთხევა, რომ შევხვედროდი მას. ეს შეხვედრა არ იყო უბრალოდ ფორმალური — ეს იყო ძალიან ღრმა, ადამიანური და სულიერი გამოცდილება. მისი მზერა, სიმშვიდე და უბრალო სიტყვებიც კი განსაკუთრებულ ძალას ატარებდა. იმ მომენტში იგრძნობოდა ისეთი სითბო და სიწმინდე, რაც იშვიათად თუ შეგხვდება ცხოვრებაში.
მივიღე მისი კურთხევაც — და ეს არის ის განცდა, რომელიც შენში რჩება. არა ხმაურით, არა დეკლარაციით, არამედ ჩუმად, გულში, როგორც სიმშვიდე და ძალა ერთდროულად.
სწორედ ამიტომ, ჩემთვის და მრავალი მორწმუნისთვის ეს შეგრძნება უკვე დიდი ხანია არსებობს — პატრიარქი ჩვენს გულებში უკვე წმინდანია. ეს არ არის ფორმალური შეფასება, ეს არის განცდა, რომელიც წლების განმავლობაში ჩამოყალიბდა მისი ცხოვრების, ღვაწლისა და ადამიანებისადმი სიყვარულის დანახვით.
რა თქმა უნდა, წმინდანად შერაცხვა ეკლესიის განსაკუთრებული პროცესია, რომელსაც თავისი დრო და წესები აქვს — და ამას უდიდესი პატივისცემით ვუყურებ.
მაგრამ ამავე დროს, ვფიქრობ, რომ არ უნდა შეგვრცხვეს იმ განცდის ხმამაღლა თქმა, რასაც ასე ბევრი ადამიანი გულში ატარებს — მადლიერება, სიყვარული და რწმენა.
მჯერა, რომ როცა დრო მოვა, ეკლესია თავად განიხილავს ამ საკითხს და მიიღებს გადაწყვეტილებას. ხოლო ჩვენთვის, მორწმუნეებისთვის, ეს გრძნობა უკვე არსებობს — გულწრფელად, მშვიდად და სიღრმისეულად“ – წერს გიორგი ფხაკაძე.
საქართველოს კათოლიკოს-პატრიარქი ილია მეორე 2026 წლის 17 მარტს 93 წლის ასაკში გარდაიცვალა.
ასევე ნახეთ:
