ბიუ ბიუ: “ჩვენს პროდუქტში ანტიბიოტიკი “ტეტრაციკლინი” არ ფიქსირდება, რის დამადასტურებელ საბუთს აქვე გაწვდით”

“ჩვენს პროდუქტში ანტიბიოტიკი “ტეტრაციკლინი” არ ფიქსირდება, რის დამადასტურებელ საბუთს აქვე გაწვდით”, — ამის შესახებ ქათმის მწარმოებელი კომპანია “ბიუ ბიუს” განცხადებაშია ნათქვამია, სადაც კომპანია ბოლო დღეებში ე.წ. სკინტლის სკანდალის გარშემო განვითარებულ მოვლენებს ეხმაურებიან.

მათვე თქმით, “დაუშვებელია ქათმის ნაკელი გამოყენებული იყოს ადამიანების ან ცხოველების საკვებად”.

“საზოგადოების დიდი ინტერესიდან გამომდინარე, გვინდა ნათელი მოვფინოთ რამდენიმე ძალიან მნიშვნელოვან საკითხს, რომელიც ყველას გვაღელვებს.

ჩვენი ვალია, მკაფიოდ და ფაქტებზე დაყრდნობით გავცეთ პასუხი გაჩენილ კითხვებს.

2013 წლიდან, წარმოების პირველი დღიდან, ჩვენი ქათამი თავისუფალია ყველა სახის ჰორმონული დანამატისა და სტეროიდისგან. მეტიც, საქართველოში არც ერთი მეფრინველეობა არ იყენებს ჰორმონებს. ამას საქართველოს კანონმდებლობაც ითვალისწინებს.

რაც შეეხება ანტიბიოტიკებს, პროდუქცია პერიოდულად მოწმდება ანტიბიოტიკების კვალზე სეს-ის მიერ და სრულიად სუფთაა.

ჩვენს პროდუქტში ანტიბიოტიკი “ტეტრაციკლინი” არ ფიქსირდება, რის დამადასტურებელ საბუთს აქვე გაწვდით.

რაც შეეხება ქათმის ნაკელს — მისგან მზადდება კომპოსტი, რომელიც გამოიყენება ნიადაგის გასაჯანსაღებლად, მცენარეებისთვის!

ნაკელის მოხმარების წესი შეგიძლიათ დეტალურად იხილოთ საიტზე: www.biuterra.ge
დაუშვებელია ქათმის ნაკელი გამოყენებული იყოს ადამიანების ან ცხოველების საკვებად.

ჩვენი კომპანია ყველაზე მასშტაბური მეფრინველეობის წარმოებაა ამიერკავკასიაში. ვფლობთ არაერთ საერთაშორისო სერტიფიკატს სურსათის უვნებლობაში, რაც ადასტურებს ჩვენს მიერ დაცულ უმაღლეს სტანდარტებს: https://chirina.ge/ge/about-us/iso-standards

მადლობა ნდობისთვის და გვერდზე დგომისთვის!

ბედნიერებას, ჯანმრთელობას, მშვიდობასა და წარმატებას ვუსურვებთ საქართველოს თითოეულ ოჯახს!”, — ნათქვამია განცხადებაში.

შეგახსენებთ, რომ პირველ აპრილს რადიო თავისუფლებამ გამოაქვეყნა ჟურნალისტური გამოძიება, რომლის მიხედვითაც ოცნების მხარდამჭერი ბიზნესმენის, ლაშა პაპაშვილის ნედლი რძის მწარმოებელი უდიდესი ფერმა “ყვარლის ბაგა” ძროხებს ევროკავშირში აკრძალული ქათმის ნაკელით კვებავდა. როგორც ირკვევა, ამ ქათმის ნაკელს “ყვარლის ბაგა” “ჩირინასგან” (“ბიუ ბიუ”) ყიდულობდა და მას შემდეგ, რაც ფერმაში ძროხები დაიხოცნენ და მათ რძეში ტეტრაციკლინი აღმოაჩინეს, 2020 წელს, “ყვარლის ბაგამ” “ჩირინას” სასამართლოში უჩივლა კიდეც.

2024 წელს, “ქართული ოცნების” ღიად მხარდამჭერმა ბიზნესმენმა, ლაშა პაპიაშვილმა, “ჩირინას” სასამართლო დავა მოუგო და მას 4,7-მილიონიანი ზარალის გადახდა დაეკისრა.

ცნობისათვის, “ყვარლის ბაგის” რძეს ყიდულობს “სანტე”, “სოფლის ნობათი”, “აგროჰაბი” და “ყვარლის ბაგის” შვილობილი “რძის ლაბორატორია”.