ბრიტანული სამეფო ასტრონომიული საზოგადოების მეცნიერებმა ახალი თეორია წამოაყენეს, რომლის მიხედვითაც, ჩვენი გალაქტიკა გიგანტური „სიცარიელის ზონის“ ცენტრში მდებარეობს. შესაძლოა ეს სამყაროს გაფართოების სიჩქარის გაზომვებში არსებულ წინააღმდეგობებს ხსნიდეს.
„კოსმოლოგიური კრიზისის შესაძლო განმუხტვა შეიძლება იმაში მდგომარეობდეს, რომ ჩვენი გალაქტიკა კოსმოსური „უდაბნოს“ ცენტრში იმყოფება“, – აღნიშნა ინდრანილ ბანიკმა, პორტსმუთის უნივერსიტეტიდან.
მეცნიერმა განმარტა, რომ ასეთ პირობებში მატერია ტენდენციით მოძრაობს სიცარიელის საზღვრებისკენ, რაც მას კიდევ უფრო „ცარიელს“ ხდის. შედეგად, გვეჩვენება თითქოს ახლომდებარე ობიექტები ერთმანეთს უფრო სწრაფად შორდებიან, ვიდრე შორეული გალაქტიკები.
მონაცემებში შეუსაბამობა პირველად 2015 წელს გამოვლინდა, როცა ტელესკოპმა „პლანკი“ სამყაროს გაფართოების სიჩქარე 67.9 კმ/წმ-ად განსაზღვრა, ხოლო „ჰაბბლმა“ – 73 კმ/წმ-ად. შემდგომი დაკვირვებებიც ამ აცდენას ადასტურებდა, რაც თანამედროვე კოსმოლოგიურ მოდელებს ეჭვქვეშ აყენებს.
გამოთვლებით, ჩვენი გალაქტიკა შესაძლოა მდებარეობდეს რეგიონში, რომლის დიამეტრიც დაახლოებით 1 მილიარდი სინათლის წელიწადია და სადაც მატერიის სიმკვრივე საშუალოზე 20%-ით ნაკლებია.
მეცნიერები ამ ჰიპოთეზის გადამოწმებას შორეულ გალაქტიკებში უძველესი ვარსკვლავების შესწავლის გზით გეგმავენ.
