ხორცის პროდუქტები და რძის პროდუქტები არის მაღალი რისკის შემცველი, – ამის შესახებ რადიო „პალიტრის“ გადაცემაში „თქვენი დრო“ სტრატეგიული კვლევების და განვითარების ცენტრის მომხმარებლის უფლებების დაცვის პროგრამის ხელმძღვანელმა, ვახტანგ კობალაძემ განაცხადა.
როგორც მან განმარტა, ხორცისა და რძის პროდუქტებისგან ადამიანი შესაძლოა, იმდენად მძიმედ მოიწამლოს, რომ ლეტალობა დადგეს. სწორედ ამიტომ, მნიშვნელოვანია, რომ მოქალაქემ რძის და ხორცის პროდუქტები სიფრთხილით შეარჩიოს.
„ხორცპროდუქტები არის მაღალი რისკის შემცველი. ჩვენთან არ არის დადგენილი რას შეიძლება ეწეროს სოსისის, ძეხვი და ა.შ. რძის ნაწარმის რეგლამენტი როცა იქნა მიღებული, ერთ-ერთი საკითხი იყო ის, რომ მცენარეული ცხიმის შემცველ პროდუქტს არ შეიძლებოდა წერებოდა რძის ნაწარმის სახელწოდება. ხორცპროდუქტების შემთხვევაში მსგავსი რეგლამენტი არ არსებობს.
მეორე არის უვნებლობასთან დაკავშირებული საკითხები – ხორცის პროდუქტები და რძის პროდუქტები არის მაღალი რისკის შემცველი. ამ პროდუქტებისგან ადამიანი შეიძლება ისე მოიწამლოს, რომ სიკვდილის შემთხვევებიც არის. ასევე შეიძლება ცხოველური დაავადებები გადაედოს ადამიანს, აქედან გამომდინარე ამ პროდუქციის შერჩევისას სიფრთხილეა საჭირო, ასევე სახელმწიფო უფრო მეტად უნდა აკონტროლებდეს“, – განაცხადა კობალაძემ.
როგორც მან აღნიშნა, თავი უნდა შევიკავოთ ისეთ ადგილებში პროდუქციის შეძენისგან, სადაც არ არის სათანადო ჰიგიენური მოთხოვნები დაცული. ეს განსაკუთრებით ეხება მალფუჭებად პროდუქციას.
„ჩურჩხელა არ არის მაგალითად მალფუჭებადი, მაგრამ მისი გარეგანი დაბინძურება, შეხებით თუნდაც, რა პირობებში არის ხოლმე ჩამოკიდებული… არავის ვურჩევ ყიდვას – ღია ცის ქვეშ, მტვერში რომ არის ჩამოკიდებული. მალფუჭებადი პროდუქცია არის ძალიან საშიში – რძის ნაწარმი იქნება ეს, კვერცხი, ხორცი. გარდა იმისა, რომ შეიძლება გაფუჭდეს, საქონელი ხშირად არ არის დაკლული ვეტერინარული ზედამხედველობის ქვეშ, გარეთ იმიტომ ყიდიან, რომ არის შინაურ პირობებში დაკლული. არც ცხოველის ჯანმრთელობა ვიცით და არც მისი დაკვლის პირობები. თერმულ დამუშავებას რაც შეეხება, თერმულ დამუშავებამდე ხელით უნდა შევეხოთ იმ ხორცს, შეიძლება ჯილეხი გადაგვედოს და თერმული დამუშავებასაც გააჩნია“, – განაცხადა კობალაძემ. წყარო
