ავტოსადგურების სერტიფიცირების ბოლო ვადა 1 ივნისია
2025 წლის 1-ელი ივნისიდან საქართველოში ყველა ავტოსადგური სერტიფიცირების ახალი რეგლამენტით იმუშავებს. ტრანსპორტის დარგში მიმდინარე რეფორმების ფარგლებში, სადგურებს დაეკისრათ ვალდებულება, დააკმაყოფილონ განახლებული სტანდარტები, რაც მომხმარებელთა კომფორტისა და უსაფრთხოების გაუმჯობესებას ემსახურება. სერტიფიცირების გარეშე ავტოსადგურის ფუნქციონირება აკრძალული გახდება.
“ოკრიბას” ავტოსადგურები ახალ სტანდარტებზე გადადიან
ქვეყნის ერთ-ერთი მსხვილი ავტოსადგურების მფლობელი კომპანია “ოკრიბა”, რომელიც თბილისში და ქუთაისში ოპერირებს, აცხადებს, რომ ორივე ობიექტი სრულად მოასწრებს განახლებას დადგენილ ვადამდე. კომპანიის იურისტის, პაატა ყვავაძის თქმით, სადგურებში მიმდინარეობს ინფრასტრუქტურის მოდერნიზაცია – ბაქნები განახლდება, დამონტაჟდება ელექტრონული ტაბლოები, რომლებიც რეისების გასვლის, ჩამოსვლის და შესაძლო დაგვიანებების შესახებ დეტალურ ინფორმაციას გადასცემენ მგზავრებს.
ბილეთების ელექტრონული სისტემა და უსაფრთხოების სტანდარტები
გარდა ფიზიკური ინფრასტრუქტურის გაუმჯობესებისა, ციფრული სერვისების დანერგვაც აქტიურად მიმდინარეობს. სახმელეთო ტრანსპორტის სააგენტო ქმნის ერთიან ელექტრონულ პლატფორმას, სადაც მგზავრებს ბილეთების ონლაინ შეძენის საშუალება ექნებათ, რაც ამ დრომდე მხოლოდ კერძო გადამზიდავებისთვის იყო ხელმისაწვდომი.
შეიცვალა უსაფრთხოების პოლიტიკაც – მძღოლებისთვის სავალდებულო გახდა ნასამართლეობის, ნარკოლოგიურ აღრიცხვასა და ჯანმრთელობაზე ცნობის წარდგენა. “ოკრიბამ” დამატებითი კონტროლის მექანიზმები დანერგა: ყოველ სამ თვეში მძღოლებს ნარკოტიკული ტესტირების წარდგენა დაეკისრებათ, ხოლო სადგური წელიწადში ორჯერ შეამოწმებს მათ სამედიცინო მდგომარეობას.
ახალი რეგულაციები მგზავრთა გადაყვანის წესებში
1 ივნისიდან მგზავრთა შორი გადაყვანა, კონკრეტულად კი 150 კმ-ზე მეტ მანძილზე, მიკროავტობუსებით აიკრძალება. ასეთ მარშრუტებზე იმუშავებენ მხოლოდ ავტობუსები, რაც მიზნად ისახავს მგზავრობის უსაფრთხოებისა და სტანდარტების ამაღლებას. უკვე ძალაშია მოთხოვნა, რომ სამგზავრო გადაყვანაში ჩართულმა მძღოლებმა სპეციალური ნებართვა მიიღონ, ხოლო მათი ჯანმრთელობის მდგომარეობა პერიოდულად შეფასდეს.
სერტიფიცირების ფასი და მოქმედების ვადა
ავტოსადგურის სერტიფიცირების ღირებულება კატეგორიიდან გამომდინარე 1000-დან 10 000 ლარამდე მერყეობს. სერტიფიკატი მოქმედებს 5 წლის ვადით, რის შემდეგაც საჭიროა მისი განახლება.
