ტრაგედია ბრაზილიაში — 21 წლის გოგონა ბანჯი-ჯამპინგის დროს დაიღუპა, ექვსი ადამიანი დააკავეს
ბრაზილიაში ბანჯი-ჯამპინგის დროს მომხდარმა ტრაგიკულმა შემთხვევამ საზოგადოებაში დიდი გამოხმაურება გამოიწვია. 21 წლის მარია ედუარდა როდრიგეს დე ფრეიტასი სან-პაულუს შტატის ქალაქ ლიმეირაში ხიდიდან გადახტომისას დაიღუპა. წინასწარი ინფორმაციით, უსაფრთხოების თოკი სათანადოდ არ იყო დამაგრებული.
შემთხვევა შაბათს, ე.წ. „ჩონჩხის ხიდზე“ მოხდა. ტრაგედიამდე რამდენიმე წუთით ადრე ახალგაზრდა ქალმა სოციალურ ქსელში ფოტო გამოაქვეყნა, სადაც გადახტომისთვის ემზადებოდა. ფოტოს აღწერაში მან ხუმრობით დაწერა: „ვინ იყო ის გიჟი, რომელმაც ხიდიდან გადახტომის უფლება მომცა?“
შემთხვევის ამსახველ ვიდეოში ისმის ადგილზე მყოფთა შეძახილები: „თოკი! ხალხო, თოკი!“
თვითმხილველების განცხადებით, შემთხვევის შემდეგ ადგილზე ქაოსი და პანიკა შეიქმნა. მათი თქმით, ხიდზე იმყოფებოდნენ როგორც ზრდასრულები, ისე ბავშვები, რომლებმაც ტრაგედია საკუთარი თვალით ნახეს.
ბრაზილიის სამხედრო პოლიციის ინფორმაციით, შემთხვევის შემდეგ ორი პირი ადგილიდან მიიმალა, თუმცა მოგვიანებით ისინი ვერტმფრენის დახმარებით ჩატარებული სამძებრო ოპერაციის შედეგად დააკავეს.
სულ დაკავებულია ექვსი ადამიანი, მათგან სამს კი განზრახ მკვლელობის ბრალდება წაუყენეს.
გამომძიებლების ცნობით, პირველადი მონაცემებით დადგინდა, რომ უსაფრთხოების აღჭურვილობა სათანადოდ არ იყო შემოწმებული და თოკი არასწორად იყო დამაგრებული, რამაც ფატალური შედეგი გამოიწვია.
საქმის გამომძიებელმა ანდრეა დანტას ლევიმ განაცხადა, რომ კომპანიას, რომელიც აღნიშნულ აქტივობას ორგანიზებას უწევდა, საქმიანობისთვის აუცილებელი ნებართვები არ გააჩნდა.
დაკავებულთა ადვოკატების მტკიცებით, კომპანიის თანამშრომლები გამოცდილები იყვნენ და ეს ორგანიზაციის ისტორიაში პირველი სასიკვდილო შემთხვევაა. თუმცა, მათი თქმითაც, ამ დრომდე უცნობია, რატომ არ ჩატარდა საბოლოო უსაფრთხოების შემოწმება მარიას გადახტომამდე.
მარია ედუარდა როდრიგეს დე ფრეიტასი ფიზიკური აღზრდისა და სპორტის მენეჯმენტის ფაკულტეტის კურსდამთავრებული იყო. იგი აქტიური ცხოვრების წესის პოპულარიზაციით იყო ცნობილი და სოციალურ ქსელებში ხშირად აქვეყნებდა ფოტოებსა და ვიდეოებს სპორტული აქტივობებიდან და მოგზაურობებიდან.
