პარლამენტში მიმდინარე კვირაში, ჯანდაცვის კომიტეტში გამართულ შეხვედრაზე ონკოქირურგებმა ისაუბრეს იმ პრობლემებზე, რაც მათ დარგში DRG-ზე გადასვლას მოჰყვა.
„ყველაზე მეტად ის საკითხი მაწუხებს, რომ ხვალ ჩემს დარგში არ ჩაიდება არანაირი ინვესტიცია, არ მიყიდიან ახალ ლაპაროსკოპიულ დანადგარს, რობოტული ოპერაციები, რისთვისაც ჩვენი პაციენტები მიდიან თურქეთში და სხვა ქვეყნებში, არ დაინერგება საქართველოში იმიტომ, რომ რობოტს არავინ იყიდის, რადგან წაგებიანია.
ხომ შეიძლება 1 წლის განმავლობაში ყველაფერი დავთვალოთ და საშუალო DRG გამოვიყვანოთ. ილიას უჯდება 15, ლექსოს 20, სხვას 10 და იყოს 12, მაგრამ იყოს ადეკვატური და შესაბამისი იმის, რომ ჩემი საშუალოდ რთული ოპერაციებით უფრო რთული დავაბალანსო“, – განაცხადა ონკოქირურგმა ილია გოცაძემ.
მისი თქმით, თუ ჯანდაცვის სამინისტრო ტარიფებს არ გადახედავს, ექიმებს ვუბიძგებ, არ ჩაატარონ ოპერაციები, პაციენტები საზღვარგარეთ გაუშვან და შუამავლობის გზით ნახონ სარგებელი.
„ჩვენს ბაზარზე ძალიან აქტიურად მუშაობენ თურქული მარკეტინგული კლინიკები. მე რომ მანდ გადავაგზავნო პაციენტი, ერთ პაციენტში მივიღებ 1000-დან 3000-დოლარამდე ქეშბექს. ბიძგია. ექიმი გრძნობს, რომ თუ მე ვარ დაუფასებელი, რატომაც არა. ვფიქრობ, ამ დარგის არასათანადო და არაობიექტური შეფასება, გამოიწვევს უნდობლობას და უფრო მეტ პრობლემას ამ დარგში“, – განაცხადა ონკოქირურგმა.
1 ნოემბერს ერთი წელი შესრულდა, რაც საყოველთაო ჯანდაცვის პროგრამის მონაწილე კლინიკები დაფინანსების DRG სისტემაზე გადავიდნენ.
პარლამენტის ჯანდაცვის კომიტეტში შეკრებილმა ექიმებმა ღიად ისაუბრეს იმ შედეგებზე, რაც სახელმწიფო პროგრამაში მონაწილე კლინიკების „დიარჯი“ სისტემის დაფინანსების სისტემაზე გადასვლამ შექმნა. ექიმები სისტემის წინააღმდეგი არ არიან. ისინი სატარიფო ცვლილებებს ითხოვენ…
