სტატიის ავტორი: ქეთი ფირცხალავა / ფსორიაზით დაავადებულ პაციენტთა ასოციაცია “ალფას” ხელმძღვანელი
21-ე საუკუნეში, როცა მედიცინა სწრაფად ვითარდება და მრავალ დაავადებასთან ბრძოლის ახალი შესაძლებლობები ჩნდება, ფსორიაზით დაავადებული ადამიანებისთვის შეიქმნა ბიოლოგიური პრეპარატები, რომლებიც მნიშვნელოვნად ამარტივებს ამ რთული დაავადების მართვას.
თუმცა, სააფთიაქო ქსელებში მათი მაღალი ფასის გამო, შეძენა არა მხოლოდ დაავადებულებისთვის, არამედ სრულიად ჯანმრთელი და შრომისუნარიანი ადამიანებისთვისაც კი თითქმის შეუძლებელია. ეს კი მიუღებელია…
მართალია, ჯანდაცვის სამინისტრო და მერია გარკვეულწილად აფინანსებენ ბიოლოგიურ პრეპარატებს, მაგრამ ეს თანხა იმდენად მცირეა, რომ პაციენტისთვის მკურნალობის დაწყებაც კი შეუძლებელი ხდება. ჩვენ, დაავადებულებს, არ უნდა გვიწევდეს იმისთვის ბრძოლა, რაც ჯანმრთელობისთვის აუცილებელია. როცა იცი, რომ არსებობს ეფექტური მკურნალობა, მაგრამ მხოლოდ შორიდან შეგიძლია უყურო მის ხელმისაწვდომობას, ეს ძალიან რთულია…
ქვეყანაში გავრცელებული „ალტერნატიული მკურნალობის“ შეთავაზებები ხშირად საფრთხეს უქმნის ფსორიაზით დაავადებულ პაციენტებს. არაერთი მოქალაქე ფინანსურადაც ზარალდება და ჯანმრთელობაც უარესდება. შესაბამისად, სახელმწიფოს ვალდებულებაა, დაიცვას მოქალაქეები შარლატანებისგან და მიიღოს მკაცრი სამართლებრივი ზომები მათ წინააღმდეგ. ფსორიაზით დაავადებულ ადამიანებს აქვთ სრული უფლება, მიიღონ თანამედროვე, უსაფრთხო და ეფექტური მკურნალობა.
ვისზეც გათვლილია ეს პრეპარატები, სახელმწიფოს ვალდებულება აქვს, იზრუნოს მათზე და უზრუნველყოს სოციალური პროგრამების დანერგვა, რათა დაავადებულებს მიეცეთ შესაბამისი მკურნალობის შესაძლებლობა. საქართველოს მოსახლეობის დაახლოებით 2% ამას ნამდვილად იმსახურებს.
ჩვენი მოთხოვნის საფუძველზე, ჯანდაცვის სამინისტროში განიხილავენ სოციალური პროგრამის დანერგვის საკითხს. სამწუხაროდ, ეს პროცესი დიდ ლოდინთან არის დაკავშირებული, რაც ჩვენს ფსიქო-ემოციურ მდგომარეობაზე უარყოფითად მოქმედებს.
განსაკუთრებით მნიშვნელოვანია აღინიშნოს, რომ ფსორიაზით დაავადებულ პაციენტებს შორის მრავალი შშმ პირია, რაც კიდევ უფრო მეტად უსვამს ხაზს დაავადების სიმძიმესა და სახელმწიფოს მხრიდან განსაკუთრებული ყურადღების აუცილებლობას.
მალე პროცესში ჩაერთვება სახალხო დამცველის აპარატიც, რაც, ჩვენ დიდ იმედს გვაძლევს,რომ დააჩქარებს პროგრამის განხორციელებას. ჩვენ სრულად ვაცნობიერებთ ჩვენს უფლებებს და მკაფიო მოთხოვნას ვაყენებთ – სახელმწიფომ უნდა უზრუნველყოს ყველაფერი, რაც გვეკუთვნის.
⸻
დისქლეიმერი
აღნიშნული ინფორმაცია წარმოადგენს მხოლოდ საგანმანათლებლო და საინფორმაციო მასალას და არ ითვლება სამედიცინო, იურიდიულ ან ფინანსურ კონსულტაციად. ნებისმიერი გადაწყვეტილების მიღების წინ, გთხოვთ, მიმართოთ კვალიფიციურ სპეციალისტს.
sheniekimi.ge, pacient.ge, sheniambebi.ge და საქართველოს საზოგადოებრივი ჯანდაცვის ინსტიტუტის (PHIG) მიერ მართული ყველა სოციალური მედიის პლატფორმა არ ატარებს პასუხისმგებლობას მოცემული შინაარსის გამო. სრული პასუხისმგებლობა ეკისრება სტატიების ავტორს — ფსორიაზით დაავადებულ პაციენტთა ასოციაცია “ალფას” (საქართველო).
