ნარკომანიასთან ბრძოლის მიმართულებით, პრემიერ-მინისტრის ორი საკანონმდებლო ინიციატივა დღეს საბოლოოდ უნდა დამტკიცდეს.
საუბარია ცვლილებაზე, რომლის მიხედვითაც ე.წ. მეთადონის პროგრამას მხოლოდ სახელმწიფო განახორციელებს. მეორე ინიციატივა კი კერძო კომპანიებისთვის ფსიქოტროპული მედიკამენტების იმპორტის აკრძალვას ეხება.
პარალელურად, კანონმდებლები დაჩქარებული წესით მიიღებენ “სისხლის სამართლის კოდექსში” იმ ცვლილებებსაც, რომელიც მარიხუანასა და მცენარე კანაფთან დაკავშირებული პასუხისმგებლობის გამკაცრებას ითვალისწინებს.
პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარის, ზაზა ლომინაძის განცხადებით, ყველა ჩამნაცვლებელი თერაპია, რომელზეც პასუხისმგებლობას სახელმწიფო იღებს, უფასო იქნება.
“სახელმწიფო სრულად იღებს პასუხისმგებლობას ყველა ჩამნაცვლებელ თერაპიაზე. ფინანსური გადახდა აღარ იქნება, ეს პროგრამა იქნება უფასო, დაახლოებით, 1000 ლარამდე უწევდათ, გააჩნია, რა დოზა იყო ჩანაცვლების თერაპიაში ბუპრენოფინის პროგრამაში, მათთვის ეს ახლა იქნება უფასო, მაგრამ ძალიან მკაცრი რეგულაციებით.
პარალელურად, ვებრძვით შემოტანას, რეალიზაციას, გადაზიდვას დამზადებას. ამ კანონის პარალელურად კანაფისა და მარიხუანას მიმართულებით გავამკაცრეთ კანონმდებლობა”, – განაცხადა ზაზა ლომინაძემ.
