ჯანდაცვის მინისტრი ჟენევაში, ჯანმრთელობის მსოფლიო ასამბლეის 77-ე სესიაზე სიტყვით გამოვიდა.
მიხეილ სარჯველაძემ, ხარისხიანი ჯანდაცვის სერვისებით მოსახლეობის უზრუნველყოფის მიზნით, საქართველოში განხორციელებულ და მიმდინარე რეფორმებზე ისაუბრა. მინისტრის თქმით, მედიკამენტებზე ხელმისაწვდომობის კუთხით გატარებულმა რეფორმებმა: წამლებზე რეფერენტული ფასის განსაზღვრამ და მწარმოებლისგან, ინოვაციური მედიკამენტების პირდაპირი შესყიდვის მექანიზმის ამოქმედებამ, სახელმწიფოს შესაძლებლობა მისცა ულიმიტოდ უზრუნველყოს საკუთარი მოქალაქეები სასიცოცხლოდ აუცილებელი მედიკამენტებით.
ჯანდაცვის მინისტრმა სიტყვით გამოსვლისას აღნიშნა, რომ აქტიურად მიმდინარეობს მუშაობა არაგადამდები დაავადებების პრევენციის, ანტიმიკრობული რეზისტენტობის, ვირუსული ჰეპატიტების აღმოფხვრის მიმართულებით.
საქართველოს ჯანდაცვის მინისტრმა, ჟენევაში, ჯანმრთელობის მსოფლიო ასამბლეის ფარგლებში ორმხრივი შეხვედრები გამართა. მიხეილ სარჯველაძე ჯანმრთელობის მსოფლიო ორგანიზაციის ევროპის რეგიონულ დირექტორ ჰანს კლუგეს შეხვდა , სადაც მხარეებმა 2024-2027 წლების თანამშრომლობის სტრატეგიას მოაწერეს ხელი. ვიზიტის ფარგლებში შეხვედრები გაიმართა ამერიკის CDC-ს გლობალური ჯანმრთელობის ცენტრის ხელმძღვანელთან და გლობალური ფონდის წარმომადგენელთან.
ჯანდაცვის მინისტრთან ერთად, ჟენევაში გამართულ შეხვედრებში, პირველი მოადგილე თამარ გაბუნია და ჟენევაში, გაერო-ს განყოფილებასთან და სხვა საერთაშორისო ორგანიზაციებთან საქართველოს მუდმივი წარმომადგენელი ალექსანდრე მაისურაძე მონაწილეობდნენ.
