რძის ცილებისა და ოქროს ნანონაწილაკებისგან დამზადებული ახალი გელი შეიძლება ბოლოსდაბოლოს აღმოჩნდეს ნაბახუსევის წამალი — სრულად აგვაცილოს თავიდან ის საშინელი შეგრძნებები, რასაც ალკოჰოლის მიღების შემდეგ განვიცდით.
მიუხედავად იმისა, რომ პრეპარატზე მუშაობა ადრეულ ფაზაშია, თაგვებზე ჩატარებული პირველადი ტესტები მიუთითებს ალკოჰოლის ეფექტიანი დეტოქსიკაციის იმედისმომცემ სტრატეგიაზე.
ციურიხის ფედერალური ტექნოლოგიების ინსტიტუტის (ETH Zurich) მასალების მეცნიერის, რაფაელ მეცენგასა და სურსათის მეცნიერის, ჯიაკი სუს ჯგუფის მიერ შექმნილმა ოქროსწინწკლებიანმა გელმა ალკოჰოლის ზემოქმედების ქვეშ მყოფ თაგვებში სისხლში ალკოჰოლის დონე 40 პროცენტით შეამცირა სულ რაღაც 30 წუთში.
„ამ გელს ალკოჰოლის დაშლა ღვიძლიდან საჭმლის მომნელებელ ტრაქტში გადააქვს. იმისგან განსხვავებით, როცა ალკოჰოლი ღვიძლში მეტაბოლიზდება, შუალედური პროდუქტის სახით არ წარმოიქმნება აცეტალდეჰიდი“, – განმარტავს მეცენგა.
ნაბახუსევის ბევრ სიმპტომში სწორედ აცეტალდეჰიდია დამნაშავე, მათ შორის თავბრუსხვევაში, თავის ტკივილში, პირის გამოშრობაში, სისხლის დაბალ წნევაში, გულისცემის აჩქარებაში, კანის მაღალ ტემპერატურასა და სახის აწითლებაში.
როგორც ჯგუფმა აჩვენა, მათ გელს შეუძლია ალკოჰოლის ნაწლავებში დაშლის კატალიზება უფრო ნაკლებად ტოქსიკურ ძმარმჟავად, აცეტალდეჰიდის ნაცვლად.
ალკოჰოლის მოხმარებიდან 30 წუთის განმავლობაში, ზემოქმედების ქვეშ მყოფ თაგვებს გელი მისცეს; ამ დროის განმავლობაში, მათ სისხლში ალკოჰოლის დონე 40 პროცენტით შემცირდა, 5 საათში კი 50 პროცენტით.
ამას გარდა, თაგვებმა, რომლებსაც ალკოჰოლთან ერთად გელს ყოველდღე აძლევდნენ, უფრო ნაკლები წონა დაკარგეს და მათ ღვიძლში უკეთესად მიმდინარეობა ცხიმის მეტაბოლიზმი, ვიდრე იმ თაგვებში, რომლებსაც ათი დღის განმავლობაში მხოლოდ ალკოჰოლს აძლევდნენ. ეს იმაზე მიუთითებს, რომ გელი ამსუბუქებს რამდენიმე ორგანოს დაზიანებას.
„ჯანმრთელობისთვის უკეთესია, თუ ალკოჰოლს საერთოდაც არ დალევთ. თუმცა, ეს გელი განსაკუთრებით დააინტერესებს ადამიანებს, რომლებსაც ალკოჰოლზე სრულიად უარის თქმა არ სურთ, მაგრამ არს სხეულისთვის ზიანის მიყენება უნდათ და ამავე დროს, არ აინტერესებთ ალკოჰოლის ეფექტები“, — ამბობს მეცენგა.
ამ საოცარი გელის შესაქმნელად, მკვლევრებმა გამოიყენეს რძის შრატი — რძის წყლიანი ნაწილი, რომელიც ხაჭოს და ყველის დამზადებისას გამოიყოფა.
