აჭარის ჯანდაცვის სამინისტროს პროგრამულ სიახლეებზე, გაზრდილ დაფინანსებაზე და დაგეგმილ ცვლილებებზე, მინისტრმა ნინო ნიჟარაძემ პირველ მოადგილესთან, მარი ზანაქიძესთან ერთად, BAU ბათუმის საერთაშორისო ჰოსპიტალში სამედიცინო პერსონალთან გამართულ შეხვედრაზე ისაუბრა. კლინიკის ადმინისტრაციის განმარტებით დაწესებულებამ უკვე მიიღო შესაბამისი ნებართვა და უახლოეს პერიოდში დაიწყებენ თირკმლის ტრანსპლანტაციის ჩატარებას აჭარაში რეგისტრირებული საქართველოს მოქალაქეებისათვის.
„მოხარული ვართ, რომ რეგიონის სამედიცინო დაწესებულებები აფართოებენ სამედიცინო სერვისებს და მოსახლეობას საშუალება ეძლევათ ადგილზე მიიღონ მათთვის საჭირო სამედიცინო მომსახურება. ბათუმის საერთაშორისო ჰოსპიტალი ასევე აქტიურად არის ჩართული სამინისტროს „გულის ქირურგიის დამატებითი სამედიცინო მომსახურების“ პროგრამის განხორციელებაში. მინდა აღვნიშნო, რომ სახელმწიფო დაფინანსებით და აჭარის ჯანდაცვის სამინისტროს თანადაფინანსებით, აჭარაში რეგისტრირებული მოქალაქეებისათვის სრულად იფარება გეგმიური და ურგენტული კარდიოქირურგიული ოპერაციები. სამინისტრო ასევე აფინანსებს გულის და კორონალური არტერიების გეგმიურ ანგიოგრაფიას“ – განაცხადა, მინისტრმა ნინო ნიჟარაძემ.
სამედიცინო დაწესებულებებში სამინისტროს წარმომადგენელთა შეხვედრების მიზანს წარმოადგენს, ექიმებისთვის სამინისტროს 2024 წლის პროგრამული სიახლეების გაცნობა, სამედიცინო დაწესებულების მიერ სამინისტროს პროგრამებში ჩართულობა, ასევე ახალი შესაძლებლობებისა და საჭიროებების გამოვლენა.
