რესპირაციულ-ვირუსული ინფექციები ქვეყანაში კვლავ აქტიურია, თუმცა სეზონური ვირუსების პიკი გადავლილია. ამ ეტაპზე ქვეყანაში ყველაზე გავრცელებულია რესპირატორულ-სინციტიური ვირუსი.
დაიკლო „ა“ გრიპის სეზონური ვირუსის შემთხვევებმა, თუმცა, მომატებულია „ბ“ გრიპის ხვედრითი წილი. დასტურდება კოვიდ 19-ის შემთხვევებიც. ჯერ კიდევ ბევრი და ყველა ასაკობრივი ჯგუფის პაციენტი მიმართავს სამედიცინო დაწესებულებებს. ინფექციონისტები შემთხვევების კლებას მარტის ბოლოს ვარაუდობენ, მოსახლეობას კი სიფრთხილისკენ მოუწოდებენ.
„ბოლო ორი თვის განმავლობაში პირველად, გრიპი აღარ არის დომინანტური ვირუსი საქართველოში და ისევ რესპირატორულ-სინციტიური ვირუსი გახდა ყველაზე ხშირი. მომართვიანობა მთელი ამ პერიოდის განმავლობაში, დაწყებული დეკემბრის ბოლო ორი კვირიდან დღემდე, რჩება მაღალი. 5-6 პაციენტი წვება ფილტვის ანთებით, რომელიც წარმოადგენს ერთ-ერთ ყველაზე სერიოზულ გართულებას სწორედ გრიპის ვირუსის შემთხვევაში. გრიპი და გრიპისმაგვარი დაავადებები გადავლილია უკვე და შემდეგი კვირების განმავლობაში ველოდებით ამ შემთხვევების კლებას“, – განაცხადა იაშვილის სახელობის ბავშვთა ცენტრალური საავადმყოფოს სამედიცინო დირექტორმა ივანე ჩხაიძემ.
