„ეს პირდაპირ დაკავშირებულია ონკოლოგიასთან…“ – მარიამ ჯორჯაძე

ბიოლოგიურ მეურნეობათა ასოციაცია „ელკანას“ დირექტორის მარიამ ჯორჯაძის განცხადებით, წარმოების სტანდარტის და აგროქიმიკატების გამოყენების დროს დოზების დაცვა არაბიომეურნეობების შემთხვევაშიც აუცილებელია. ვაშლის ბაღების  შეწამვლა წლის განმავლობაში 35-ჯერ ხდება.

მისი თქმით, პრობლემაა ფერმერებში შესაბამისი ცოდნა და ქიმიკატების გამოყენების წესების დაცვა, რასაც ფერმერების ნაწილი არ ითვალისწინებს.

“მწარმოებლები, რომლებიც ჩართული არიან ამ პროცესში, მაღალი რისკის ქვეშ არიან. ფერმერები ხშირ შემთხვევაში არ არიან ინფორმირებული, ქიმიკატები როგორ უნდა გამოიყენონ. ეს პირდაპირ დაკავშირებულია ონკოლოგიასთან“, – აცხადებს მარიამ ჯორჯაძე.

ბიოლოგიურ მეურნეობათა ასოციაცია „ელკანას“ დირექტორმა, განაცხადა, რომ ქიმიური ნივთიერებები, რომლის გამოყენება ბევრ ქვეყანაში აკრძალულია, საქართველოს ბაზარზე უპრობლემოდ შემოდის.

მისი თქმით, რისი აკრძალვაც ხდება ევროკავშირში, იმის ასახვა მაშინვე არ ხდება ჩვენთან.

„ლიმფოზინატები ბევრ ქვეყანაში აკრძალულია, ჩვენთან არ არის აკრძალული და შემოდის. ყველაზე სავალალო მდგომარეობა ისაა, რომ მის ტარას იყენებენ ან ყრიან. ამ ნარჩენების გადამუშავების გარკვეული წესები არსებობს, რისი ცოდნის და განათლების პრობლემაა. მხოლოდ ის კი არა, რომ არ აცვიათ სპეციალური ტანსაცმელი, იყო შემთხვევები, როცა ხუმრობით ერთმანეთს წუწავდნენ, რაც დაუშვებელია. ყოფილა გარდაცვალების შემთხვევებიც, როცა პრეპარატი არასათანადო ჭურჭელში ესხა.

კონტროლის მექანიზმები არ არის საკმარისი და არ არის ცოდნა. კანონი კრძალავს დაირღვეს შეფუთვა, მაგრამ როცა მთლიანი შეფუთვის შეძენის საშუალება არ აქვთ, ხშირია შეფუთვის დაზიანება, რაც სავალალოდ სრულდება“, – აცხადებს მარიამ ჯორჯაძე.