4 ოქტომბრის ძალადობრივი მოვლენების საქმეში ერთ-ერთ მსჯავრდებულ ნიკა გვენცაძესთან საპროცესო შეთანხმება გაფორმდება. ამის შესახებ სასამართლო სხდომაზე პროკურორმა ვაჟა თოდუამ განაცხადა.
პროკურორის თქმით, გვენცაძემ პირადად მიმართა საგამოძიებო უწყებას და განცხადებაში მიუთითა, რომ სრულად აღიარებს ჩადენილ ქმედებას, ინანიებს და ითხოვს შეთანხმების დადებას. ბრალდების მხარემ მისი თხოვნა განიხილა, დააკმაყოფილა და სასამართლოს გამამტყუნებელი განაჩენის გამოტანის შუამდგომლობით მიმართა.
შეთანხმების პირობებით, გვენცაძეს სასჯელის სახით განესაზღვრება ერთი წლით რეალური თავისუფლების აღკვეთა პენიტენციურ დაწესებულებაში, აგრეთვე სამი წლის პირობითი მსჯავრი. გვენცაძის საქმე ცალკე სამართალწარმოებად გამოიყო და სხვა მოსამართლე განიხილავს.
სხდომა გადაიდო — შეთანხმება მომდევნო სასამართლო სხდომაზე განიხილება და დამტკიცდება.
პროკურორმა ასევე განმარტა, რომ სხვა მსჯავრდებულთა მიმართაც იგივე პრინციპი იმოქმედებს: ვინც ბრალს აღიარებს, მოინანიებს და შეთანხმებას მოითხოვს, ბრალდების მხარე განიხილავს ამ განცხადებებს და შესაბამის გადაწყვეტილებას მიიღებს.
Sheni Ambebi News
წყარო: primetime.ge
QR კოდი
სტატიის ციტირება
შენი ამბები. (2026). ნიკა გვენცაძე დანაშაულს აღიარებს — 4 ოქტომბრის მოვლენების საქმეში საპროცესო შეთანხმება იდება. 14 სექტემბერი, 2026. https://sheniekimi.ge/ambebi/ნიკა-გვენცაძე-დანაშაულს/
