ახალმა ფართომასშტაბიანმა კვლევამ აჩვენა, რომ HPV-ის (ადამიანის პაპილომავირუსის) საწინააღმდეგო ვაქცინაცია ახალგაზრდა ქალებში საშვილოსნოს ყელის კიბოთი გარდაცვალების რისკს თითქმის ნულამდე ამცირებს. კვლევა ლონდონის დედოფალ მერის უნივერსიტეტის მეცნიერებმა ჩაატარეს და ის ავტორიტეტულ სამედიცინო ჟურნალ The Lancet-ში გამოქვეყნდა.
მკვლევრებმა დაადგინეს, რომ ქალებს, რომლებმაც HPV-ის ვაქცინა 12-13 წლის ასაკში მიიღეს, 30 წლამდე საშვილოსნოს ყელის კიბოთი გარდაცვალების რისკი პრაქტიკულად აღარ აქვთ. განსაკუთრებით აღსანიშნავია, რომ 2020-2024 წლებში ინგლისში 20-24 წლის ასაკის არც ერთი ქალი არ გარდაცვლილა ამ დაავადებით – მსგავსი შემთხვევა ქვეყნის ისტორიაში პირველად დაფიქსირდა.
კვლევის ავტორების შეფასებით, HPV-ის ვაქცინამ ინგლისში უკვე დაახლოებით 200 ახალგაზრდა ქალის სიცოცხლე გადაარჩინა. მეცნიერები აღნიშნავენ, რომ ვაქცინაცია და რეგულარული სკრინინგი ერთად შესაძლოა იმდენად ეფექტური აღმოჩნდეს, რომ მომავალში საშვილოსნოს ყელის კიბო იშვიათ დაავადებად იქცეს.
HPV ინფექცია საშვილოსნოს ყელის კიბოს შემთხვევების დაახლოებით 99%-თან არის დაკავშირებული, რის გამოც ჯანდაცვის მსოფლიო ორგანიზაცია ვაქცინაციას დაავადების პრევენციის ერთ-ერთ ყველაზე ეფექტურ საშუალებად მიიჩნევს.
