თბილისის ზღვის ტერიტორიაზე ახალი ზოოპარკი ზაფხულში ეტაპობრივად გაიხსნება
თბილისის ზოოპარკის ახალი კომპლექსი, რომელიც თბილისის ზღვის მიმდებარე ტერიტორიაზე შენდება, დამთვალიერებლებისთვის ზაფხულში ეტაპობრივად გაიხსნება. ამჟამად ადგილზე აქტიურად მიმდინარეობს ინფრასტრუქტურის მოწყობისა და გამწვანების სამუშაოები.
ზოოპარკის ადმინისტრაციის ინფორმაციით, პირველ ეტაპზე მხოლოდ კავკასიის რეგიონის განყოფილება გაიხსნება, სადაც წარმოდგენილი იქნება საქართველოში გავრცელებული ცხოველთა სახეობები. ახალი სივრცე ვიზიტორებს უფრო ფართო ვოლიერებითა და თანამედროვე სტანდარტების შესაბამისი ექსპოზიციებით დახვდება.
„ამ ეტაპზე ვგეგმავთ ზოოპარკის ერთი ნაწილის გახსნას. პირველ რიგში, კავკასიის რეგიონის განყოფილება ამოქმედდება, სადაც ადგილობრივი ფაუნის წარმომადგენლები იქნებიან წარმოდგენილი“, – აცხადებენ ზოოპარკში.
პროექტის ფარგლებში ეტაპობრივად დაემატება ახალი ზონებიც, მათ შორის აფრიკის სავანის სივრცე. ზოოპარკის ხელმძღვანელობის ცნობით, უკვე აშენებულია ჟირაფებისთვის განკუთვნილი ვოლიერი და მომავალში მათი ჩამოყვანის შესაძლებლობაც განიხილება.
„ჟირაფებისთვის განკუთვნილი ვოლიერი უკვე მზად არის. შემდეგ ეტაპზე ვიზრუნებთ შესაბამისი პირობების შექმნასა და ცხოველების ჩამოყვანაზე, რაც სპეციალისტების ჩართულობასა და საერთაშორისო სტანდარტების დაცვას მოითხოვს“, – განმარტავენ ზოოპარკში.
ადმინისტრაციის განცხადებით, ცხოველების მოვლა და კეთილდღეობა საერთაშორისო სტანდარტების შესაბამისად იქნება უზრუნველყოფილი. ამ მიზნით თანამშრომლები რეგულარულად მონაწილეობენ პროფესიულ ტრენინგებში როგორც საქართველოში, ისე საზღვარგარეთ.
რაც შეეხება ძველ ზოოპარკს, ის ამ დრომდე ფუნქციონირებს, თუმცა შეზღუდულ ტერიტორიაზე. ცხოველების ნაწილი უკვე გადაყვანილია ახალ კომპლექსში, მიუხედავად ამისა, ვიზიტორთა ინტერესი განსაკუთრებით ზაფხულის პერიოდში კვლავ მაღალია.
ზოოპარკის წარმომადგენლების თქმით, ახალი კომპლექსის გახსნის შეფერხება ძირითადად ტექნიკურ და ინფრასტრუქტურულ სირთულეებს უკავშირდებოდა. ახალი კონცეფციის მიხედვით, ზოოპარკი ბუნებრივ გარემოსთან მაქსიმალურად მიახლოებულ სივრცედ უნდა ჩამოყალიბდეს, სადაც ცხოველები მათთვის შესაბამის ლანდშაფტურ პირობებში იცხოვრებენ.
შეგახსენებთ, რომ ახალი ზოოპარკის მშენებლობისთვის თბილისის ზღვის ტერიტორია 2015 წლის 13 ივნისის ტრაგედიის შემდეგ შეირჩა. კომპლექსი 48 ჰექტარ ფართობზეა განთავსებული, ხოლო მისი სრულად მოწყობა, შეფასებით, დაახლოებით 50 მილიონი დოლარის ინვესტიციას მოითხოვს.
