თბილისში დაკარგული ინდოელი სტუდენტი გარდაცვლილი იპოვეს — გამოძიება მიმდინარეობს
თბილისში თითქმის ორი კვირის განმავლობაში დაკარგულად გამოცხადებული 23 წლის ინდოეთის მოქალაქე, სტუდენტი დვანიტ რაჯდიპი, გარდაცვლილი აღმოაჩინეს. მისი ცხედარი მდინარე მტკვარში იპოვეს.
საქართველოს შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
ახალგაზრდასთან კავშირი ოჯახმა ბოლოს 14 მაისს დაამყარა. ოჯახის წევრების განცხადებით, სატელეფონო საუბარი მოულოდნელად შეწყდა, რის შემდეგაც მისი მობილური ტელეფონი გათიშული იყო და მასთან დაკავშირება ვეღარ მოხერხდა.
ინდური მედიის ცნობით, სტუდენტის ოჯახი ამტკიცებდა, რომ დვანიტ რაჯდიპს საცხოვრებელი ბინის მეპატრონისა და მისი გარემოცვის მხრიდან გარკვეული პრობლემები ჰქონდა. ოჯახის ვერსიით, ახალგაზრდას კონფლიქტი ჰქონდა იმ პირებთან, ვისთანაც ცხოვრობდა. მამა, მაიურ რაჯდიპი, აცხადებდა, რომ მისი შვილი ფსიქოლოგიური ზეწოლისა და შევიწროების მსხვერპლი იყო.
ოჯახის ინფორმაციით, დვანიტმა საბოლოოდ საცხოვრებლის დატოვება გადაწყვიტა. ამის შემდეგ მამამ მას ინდოეთში დასაბრუნებელი ავიაბილეთი შეუძინა, თუმცა აეროპორტში გამგზავრებამდე მასთან კავშირი კვლავ შეწყდა.
დაკარგულის მამა მედიასთან ამბობდა, რომ მისი შვილი გამქირავებლის – წარმოშობით სამხრეთ ინდოელი მამაკაცის, სახელად ანილის – და მისი თანამცხოვრებლების მხრიდან მუდმივ შევიწროებასა და ჩაგვრას განიცდიდა.
მისი თქმით, ისინი სტუდენტს სისტემატურად ჰპარავდნენ ფულს, პირად სამოსსა და საკვებს. როდესაც სასოწარკვეთილმა დვანიტმა აღნიშნული ბინის დატოვება გადაწყვიტა, ანილმა უარი განაცხადა წინასწარ გადახდილი დეპოზიტის დაბრუნებაზე. მეტიც, თანამზრახველებთან ერთად მან ახალგაზრდა ოთახში გამოკეტა, მობილური ტელეფონი ჩამოართვა და მუქარითა და ძალადობით ანგარიშიდან 6,500 აშშ დოლარი გამოსძალა.
მედიაში გავრცელებული ცნობებით, სტუდენტის გაუჩინარებამდე არსებობდა ხანგრძლივი დაპირისპირება ახალგაზრდასა და ბინის მეპატრონეს შორის. ინდური გამოცემები ასევე წერენ, რომ კონფლიქტს წინ უძღოდა რამდენიმე ინციდენტი, რის შესახებაც ოჯახის წევრები წინასწარ იყვნენ ინფორმირებულნი.
დვანიტ რაჯდიპის ძმა, რომელიც კანადიდან საქართველოში სპეციალურად ჩამოვიდა, აქტიურად იყო ჩართული მისი ძმის ძებნის პროცესში. ოჯახის წევრები აცხადებდნენ, რომ მათთვის ცნობილი გახდა რამდენიმე პირის დაკითხვის შესახებ, თუმცა სამართალდამცავებმა მათ მიმართ დამატებითი შემზღუდავი ღონისძიებები არ გამოიყენეს.
საქმეზე გამოძიება გრძელდება და სამართალდამცავი ორგანოები ყველა გარემოების დადგენაზე მუშაობენ. ამ ეტაპზე ოფიციალური უწყებების მიერ დამატებითი დეტალები არ გავრცელებულა.
