პაპუნა ლოცულაშვილის მიმართ ძალადობის საქმეზე ბრალდებული ერთ-ერთი პოლიციელი, საბა წაველიძე 19 წლის არის.
სასამართლო სხდომაზე, სადაც წაველიძისა და სხვა ბრალდებული სამართალდამცველებისთვის აღკვეთის ღონისძიების საკითხი განიხილებოდა, პროკურატურა ყველა მათგანისთვის პატიმრობის შეფარდებას ითხოვდა. დაცვის მხარე ამ მოთხოვნას არ ეთანხმებოდა.
საბა წაველიძის ადვოკატის, ზურა კაპანაძის განცხადებით, მისი დაცვის ქვეშ მყოფი გამოძიებასთან პირველივე დღიდან თანამშრომლობს. ადვოკატი ყურადღებას ამახვილებს ბრალდებულის ასაკზეც და ამბობს, რომ 19 წელი მხოლოდ ბიოლოგიური გარემოება არ არის — ამ ასაკში პირი რეაბილიტაციის შესაძლებლობის მქონედ უნდა შეფასდეს, რის გამოც პატიმრობა, მისი პოზიციით, მიზანშეწონილი არ არის.
კაპანაძის თქმით, წაველიძეს ნასამართლობა არ აქვს და წარსულში ძალადობრივი ქმედება არ ჩაუდენია. ადვოკატის განმარტებით, აღკვეთის ღონისძიების მიზნების მიღწევა შესაძლებელია ნაკლებად მკაცრი ზომებითაც, მათ შორის გირაოთი, შინაპატიმრობით, ელექტრონული სამაჯურით ან პოლიციაში გამოცხადების ვალდებულებით.
ცნობისთვის, გორში, ე.წ. კომბინატის დასახლებაში, სამართალდამცველების მხრიდან ფიზიკური ძალადობის ფაქტზე ორი მოქალაქე — პაპუნა ლოცულაშვილი და მისი მეგობარი — დაზარალდნენ.
საქმეზე დაკავებულია ექვსი სამართალდამცველი. მათ ბრალი ედებათ სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით, რაც ძალადობით ჩადენილ სამსახურებრივი უფლებამოსილების გადამეტებას გულისხმობს. აღნიშნული დანაშაული სასჯელის სახით 5-დან 8 წლამდე თავისუფლების აღკვეთას ითვალისწინებს.
ამასთან, გამოძიება მიმდინარეობს პაპუნა ლოცულაშვილის მიმართაც სისხლის სამართლის კოდექსის 353-ე მუხლით, რაც პოლიციელის მიმართ ძალადობას გულისხმობს.
გორში ძალადობის ბრალდებით დაკავებულ 6-ვე პოლიციელს აღკვეთის ღონისძიების სახით პატიმრობა შეეფარდათ.
QR კოდი
სტატიის ციტირება
შენი ამბები. (2026). ადვოკატის თქმით, “ასეთ ასაკში პატიმრობის გამოყენება მიზანშეწონილი არაა” – პაპუნა ლოცულაშვილის მიმართ ძალადობის საქმეზე ბრალდებული ერთ-ერთი პოლიციელი, საბა წაველიძე 19 წლის არის. 29 მაისი, 2026. https://sheniekimi.ge/ambebi/ადვოკატის-თქმით-ასეთ-ასა/
