ქსელურ მარკეტებში დღეიდან ფასდაკლებული პროდუქტების სტენდები განთავსდა – კომპანიებში განმარტავენ, რომ მომხმარებელს სოციალურ კალათაში განთავსებული 15 სახეობის პროდუქტის შეძენა შეუძლია.
“კარფური”, “სპარი”, “მაგნიტი”, “კალათა”, “უნივერსამი”, “გუდვილი”, “ზღაპარი”, “ნიკორა”, “ლიბრე” და “აგროჰაბი” – კალათის შექმნის და სასურსათო პროდუქტებზე ფასდაკლების სურვილი ყველა ქსელურმა მარკეტმა გამოთქვა.
“ლიბრეში” აცხადებენ, რომ სოციალური კალათის პროდუქტებზე ახალი აქციები ამოქმედდა, რომლის ფარგლებშიც მომხმარებლები სხვადასხვა პროდუქტის შეძენას შემცირებულ ფასად შეძლებენ.
კომპანიის ინფორმაციით, სპეციალური შეთავაზებები პერიოდულად განახლდება.
“ჩვენს ქსელში დაემატა რამდენიმე ტიპის აქცია, რომელიც სამომხმარებლო კალათიდან შესთავაზებს მომხმარებლებს კიდევ უფრო დაბალ ფასებს იმ პროდუქტებზე, რომლებიც, შეიძლება ითქვას, რომ არის სოციალური კალათიდან. ეს აქტივობა გვექნება სამ დღეში ერთხელ, ანუ ყოველ სამ დღეში განმეორდება ხოლმე სხვადასხვა პროდუქტებზე.
მომხმარებელმა, რომ მარტივად მიაგნოს ჩვენთან ქსელში ამ პროდუქტებს, მსგავსი პროდუქტები წარმოდგენილი იქნება დამატებითი განთავსების ადგილებზე, შეიძლება კალათებში და მათ განსხვავებული ფასმაჩვენებლებიც ექნება. ფასდაკლება შეიძლება მერყეობდეს 30%-დან 50%-მდე”, – აცხადებს “ლიბრეს” კომერციული დირექტორი გიორგი გოცირიძე.
